Herold

Stortinget har gjeve Ap-regjeringa marsjordre om å ikkje kutte i flytilbodet i Sør-Norge.

– Ap-regjeringa må haldast i øyra. No får dei marsjordre frå Stortinget om å ikkje kutte i flytilbodet Sør-Norge. Det ville svekka konkurransekrafta til næringslivet og moglegheita folk har til å bu og arbeide i Sogn og Fjordane, seier Venstre-leiar Guri Melby i ei pressemelding.

Onsdag inviterte alle partia, utan om Arbeidarpartiet, til pressekonferanse om FOT-rutene i Sør-Norge. Dei vil stoppe regjeringa sitt forslag om å bygge ned flyrutene på lokalflyplassane.

– Vi har hatt som utgangspunkt å lage eit forslag som kunne få eit breitt fleirtal, og det har vi klart, seier Erling Sande i Senterpartiet, som har vore sentral i arbeidet.

Han har tidlegare kritisert Arbeidarpartiet for å vere svært Oslo-orientert og meiner han no har fått sterkare bevis på dette.

– Det må vere ein kraftig vekkar for Arbeidarpartiet på Vestlandet når alle andre parti no framstår som meir vestlandsvenlege enn Arbeidarpartiet, seier Erling Sande.