Herold

Halvard Martin Aag var ikkje einig i kravet om å betale tilbake 1,2 millionar kroner. I dag kom dommen etter at legen gjekk til sak mot staten.

Aag har i mange år vore fastlege på Radøy.

Som ein del av arbeidet har han hatt ein avtale med Helfo. Den gjekk ut på at Aag kunne få direkteutbetalingar av trygderefusjonar for behandlingar han utførte på pasientar.

Utbetalingane frå Helfo er basert på at fastlegen følger eit takstsystem ut frå den undersøkinga eller behandlinga som blir utført på legekontoret.

Systemet desse utbetalingane skjer på er basert på tillit. Helfo tar altså utgangspunkt i at fastlegen sender riktige krav for tilbakebetaling.

Den statlege etaten kan i ettertid gå inn i systemet og vurdere om legen har følgd dei rette takstane.

I tilfellet med Halvard Martin Aag meinte Helfo at han hadde overfakturert for 1,6 millionar. Han mista og retten til å praktisere for trygda for ein periode.

Etter ei klage frå Aag blei summen for tilbakebetaling sett ned til 1,2 millionar kroner.

Stilt spørsmål til tidsbruken

Med støtte frå Legeforeningen har Aag gått til sak mot staten. Legen var ikkje einig med vurderinga om refusjonskravet.

Den siste tida har saka vore behandla i Oslo tingrett. Motparten til Aag har vore den norske staten ved Helse- og omsorgsdepartementet.

I tingretten har ein berre sett på saka rundt faktureringa. Spørsmålet om retten til å praktisere har ikkje vore ein del av det som har vore gjennomgått av tingretten.

I botn for saka i Oslo tingrett har det ligge at Helfo meiner at Aag har feilfakturert 17 av dei 60 refusjonane dei har sett på.

Legeforeningen, som altså har støtta Aag i saka, har meint at Alver-legen har hatt ei god sak. Foreininga har mellom anna reagert på kontrollpraksisen til Helfo.

Det statlege organet har i fleire av dei gjennomgåtte refusjonane stilt spørsmål ved tidsbruken til legen. Legeforeningen meiner at det er problematisk å stille spørsmål til behova pasienten har og tidsbruken til legen.

– Dette er problematisk fordi legen då ikkje kan bruke den tida han meiner det er medisinsk behov for, har Legeforeningen sin advokat Øyvind Anmarkrud tidlegare sagt til NRK.

Vann fram

Vesle julaftan kom dommen frå Oslo tingrett.

Den fortel at Aag medhald for tolv av dei 17 refusjonane som har vore ein del av saka. Av desse har han fått medhald for åtte av dei ni sakene som har handla om refusjonar om tidsbruk.

Spørsmålet om ei sak er vunnen i sin heilskap, blir vurdert ut frå kor stor del av saka parten har fått medhald i.

I dommen kjem det fram at retten meiner at saka går i Aag sin favør: «Retten finner vidare at tyngdepunktet av saken har dreid seg om bruk av tidstakst, hvor Aag har fått medhald for 8 av 9 regninger. Retten finner etter en samlet vurdering at Aag må anses for å ha vunnet saken i det vestentlige», står det i dommen.

Samstundes finn retten at Aag har full rett på erstatning for sakskostnadane sine på kring 370.000 kroner.