Herold

Bondeorganisasjonane har lagt fram eit krav på 4,2 milliardar kroner i jordbruksoppgjeret i år. Tilbodet frå staten lyder på 3,2 milliardar kroner.

Med dette aukar løyvinga til jordbruksavtalen frå 16,9 milliardar kroner i 2021 til 33 milliardar kroner i 2027, altså nesten ei dobling, ifylgje Landbruks- og matdepartementet. Det er altså 1 milliard mindre enn det bøndene krev, men gapet er mindre enn ved forhandlingane i fjor.

– Staten legg i dag fram eit tilbod som svarer godt på kravet frå jordbruket. Tilbodet prioriterer auka inntektsmoglegheiter og sjølvforsyning. I tillegg blir klimatilpassing vektlagd, natur, klima, miljø og betra såkornberedskap, seier forhandlingsleiaren til staten Nils Øyvind Bergset i ei pressemelding.

Vidare listar han opp økologisk produksjon, samordning ved svangerskap og fødsel, investeringar og landbruk i Nord-Noreg.

I tilbodet blir det lagt vekt på prisveksten som fylgje av krigsutbrot i Midtausten, og at den vidare utviklinga er uføreseieleg.

– I samsvar med «Regjeringa sin plan for Noreg» fører regjeringa no vidare innsatsen for å styrkja sjølvforsyninga av mat og held fram med å gi føreseielegheit for inntektsmoglegheiter i jordbruket.

Ifylgje departementet kjem oppgjeret til å bety lite for forbrukarane.

– Det er no svært få varer som har målpris. Berre poteter, matkorn, noko grønsaker og frukt. Jordbruksavtalen vil derfor ha liten påverknad på matvareprisane. For eit hushald vil dette utgjera om lag 560 kroner per år, heiter det i meldinga.

Forhandlingane skal vera avslutta innan 16. mai, og Stortinget skal behandla jordbruksoppgjeret før sommaren.

– Ein til to legg ned kvar dag – og så lurer dei på kvifor? Her er svaret