Herold

(FIRDAPOSTEN): Politi og brannvesen er på staden etter at dei fekk melding om røykutvikling frå ein gamal bunker i terrenget ved Storåsvegen i Florø.

Det melder politiet klokka 12.15 torsdag.

– Brannen er no sløkt av brannvesenet, seier operasjonsleiar Tore-Andre Brakstad.

Han legg til at det kan verke som om det er noko som har vore påtent.

– Vi fekk melding om røyktvikling her oppe på Storåsen. Vi rykte ut og fann papp som var påtent inne i ein bunkers, fortel Robert Endestad til Firdapostens journalist på staden.

Han fortel at dei sløkte brannen, og at politiet no er på saka.

– Var det mykje røyk?

– Det var mykje røyk ja. Det var turgåarar som meldte i frå, dei gjorde ein kjempejobb med å varsle.

Endestad fortel at dette fort kunne utvikla seg til noko meir, om ikkje dei hadde fått beskjed tidleg.

– Det er framleis tørt i terrenget, sjølv om det har vore kaldt nokre dagar. Dette kunne fort ha blitt ein storbrann i Storåsen.

Det er i bunkersen som ligg like ved vanntanken i Storåsen brannen oppsto. Brannvesenet har no kontroll på situasjonen.