Herold

Gjennomsnittsprisen for diesel er høgare onsdag morgon enn dagen før, sjølv om avgiftene er reduserte.

I natt vart avgiftene på drivstoff kutta med 2,85 kroner for diesel og 4,41 kroner per liter for bensin. Det har likevel ikkje fått nokon stor effekt på pumpene.

Tysdag ettermiddag steig nemleg medianprisen på diesel og bensin med over fire kroner nasjonalt.

For diesel gjekk prisen opp 4,29 kroner, medan han gjekk 4,10 kroner opp for bensin. Det er likevel ikkje uvanleg med store prishopp i løpet av veka.

Onsdag morgon er gjennomsnittsprisen for diesel høgare enn på same tid tysdag.

– Bensin 95 kostar 21,76 kroner i dag mot 22,29 kroner i går. Ned 0,53 kroner, langt unna dei forventa 4,41 kronene, seier Syver Orhagen i Drivstoffappen til Nettavisen.

Kommunikasjonssjef Kjetil Foyn i Circle K seier til avisa at dei har kutta prisane.

– Det me har gjort, er at me har redusert prisen tilsvara avgifter, basert på den prisen som var rett før midnatt.

(©NPK)