Ambulansetilbodet i Lavik må tryggjast
Framlegget om å leggje ned ambulansestasjonen i Lavik skaper djup uro i kommunane i Sogn. Bakgrunnen er Helse Førde si saksutgreiing om endra struktur for ambulansar, med tilhøyrande risikovurderingar og framlegg til styrevedtak. Når ein les dokumenta samla, er konklusjonen vanskeleg å kome unna: Ei nedlegging av ambulansestasjonen i Lavik vil svekkje pasienttryggleiken og den samla prehospitale beredskapen i regionen.
Prosjektrapporten dokumenterer at alle vurderte alternativ til dagens ordning gir lengre responstid, mindre kapasitet og større sårbarheit. Dette kjem klårt fram i ROS-analysane, der fleire risikofaktorar er vurderte til gul og raud risiko. Det gjeld særleg samtidigheitskonfliktar, manglande grunnberedskap og lengre tid før pasient får helsehjelp. Når alle alternativa er dårlegare enn dagens løysing, meiner vi det er uforsvarleg å gå vidare med ei nedlegging.
Særleg alvorleg er det at dagens struktur ikkje er teken med som nullalternativ i risikovurderinga. Dette bryt med god utgreiingspraksis og står i kontrast til tidlegare vurderingar i Helse Førde, der ein nettopp konkluderte med at ein fullverdig ambulansestasjon i Lavik var nødvendig for å sikre forsvarlege tenester.
Responstid er den viktigaste kvalitetsindikatoren for ambulansetenester i grisgrendte område. I Hyllestad ligg responstida på akutte oppdrag allereie i dag rundt 35 minutt i snitt. Simuleringane i rapporten viser at ei nedlegging kan gi responstid på over 60 minutt. For Høyanger sørside vil responstida også auke betydeleg, medan konsekvensane for Sogndal kommune/Balestrand i liten grad er vurderte. Samla transporttid frå varsling til sjukehus kan kome opp mot tre timar. Dette er ikkje i samsvar med nasjonale mål om rask og likeverdig tilgang til akutt helsehjelp.
Ambulansestasjonen i Lavik er sentral for beredskapen langs E39, for industrien i regionen og for transportmønsteret mellom nord og sør i Helse Førde sitt opptaksområde. Fell denne stasjonen bort, vil det føre til auka press på nabostasjonar og svekka beredskap også i andre kommunar.
Difor ber vi styret i Helse Førde halde fast ved vedtaket frå 2021 om fullverdig ambulansestasjon i Lavik. Dersom ein likevel meiner saka må vurderast vidare, ber vi om at vedtaket vert utsett, og at det vert etablert ei felles arbeidsgruppe mellom Helse Førde og kommunane.
Endringar i akuttberedskap må vere fagleg forsvarlege, kunnskapsbaserte og lokalt forankra. Når minutt tel, må omsynet til liv og helse vege tyngst.