Herold

1500 IS-fangar har ifølge SDF-militsen rømt frå eit fengsel som har vore under SDFs kontroll. Ifølge myndigheitene i Damaskus dreier det seg om 120 IS-fangar.

Saka samanfatta

• Rundt 1500 IS-fangar skal ha rømt frå eit SDF-kontrollert fengsel, ifølgje SDF, medan syriske styresmakter oppgir talet til 120.
• Den syriske regjeringshæren har innført portforbod i Shaddadi og gjennomfører søk etter rømlingane, der 81 er pågripne.
• SDF skuldar regjeringsstyrkane for våpenkvilebrot og hevdar at USA-leidde koalisjonsstyrkar ikkje greip inn under angrepa
• Ein ny våpenkvileavtale inneber at den syriske regjeringa overtek kontrollen over interneringsleirar med IS-kvinner og barn, og dessutan at SDF blir integrert i regjeringshæren

Oppsummeringa er laga av ei KI-teneste frå OpenAI. Innhaldet er kvalitetssikra av NRKs journalistar før publisering.

Det er den kurdiske nettavisa Rudaw som siterer talsmann for SDF-militsen Farhad Shami på opplysningane om at det skal dreie seg om rundt 1500 IS-fangar.

Tidlegare måndag uttalte den syriske regjeringshæren at IS-medlemmer hadde rømt frå Shaddadi-fengselet, som hadde vore under SDFs kontroll. Da hadde ikkje myndigheitene i Damaskus oppgitt nokon tal.

Men natt til tysdag sa innanriksdepartementet at det var rundt 120 IS-fangar som rømte. Sikkerheitsstyrkar skal ha har pågripe 81 av dei etter ein aksjon i byen Shaddadi og områda rundt.

– Arbeidet går føre seg med å pågripe også resten av rømlingane, heiter det i uttalen.

Regjeringshæren har skulda SDF for å ha sleppt IS-fangane fri.

Militærmedlemmer samlast nær Raqqa-fengselet, der den syriske hæren kringset SDF-medlemmer etter at hæren tok kontroll over byen Raqqa, Syria, 19. januar 2026

Skuldingar om våpenkvilebrot

Den kurdiskdominerte militsgruppa SDF uttalte tidlegare måndag dei blir angripne, trass i våpenkvila som regjeringa og kurdarane har inngått aust i Syria og at dei har mista kontroll over Shaddadi-fengselet.

Ifølge SDF blei fleire tital kurdiske soldatar drepne og såra mens dei prøvde å forsvare fengselet mot angriparane.

SDF hevda også at den USA-leidde koalisjonen ikkje grepe inn, sjølv om fleire gonger bad om hjelp. Koalisjonen blei oppretta for å få bukt med den ytterleggåande islamistgruppa IS under borgarkrigen i Syria.

Måndag kveld innførte den syriske regjeringshæren portforbod i Shaddadi Hasaka-provinsen, der fengselet ligg.

Regjeringa skulle finkjemme byen på jakt etter IS-krigarar, heitte det i ei fråsegn referert av det statlege nyheitsbyrået Sana.

Syriske regjeringsstyrkar og lokale tilhengarar feirar at dei har tatt kontroll over byen Raqqa, den tidlegare IS-kontrollerte byen som sidan 2017 har vore under kurdisk kontroll.

Interneringsleirar med IS-kvinner

Søndag kunngjorde regjeringa i Syria ein avtale om våpenkvile med dei kurdiskdominerte styrkane Syrian Democratic Forces (SDF).

Avtalen inneber blant anna at regjeringa tar over interneringsleirane med IS-kvinner og barn i Syria, ifølge syrisk statleg media. Fram til nå har leirane vore kontrollerte av SDF.

Tre norske statsborgarar er internerte i desse leirane, blant dei Aisha Kausar, som er terrorsikta i samband med 25. juni-skytinga i Oslo. Ho nektar straffskuld.

Våpenkvileavtalen mellom regjeringa og SDF kjem etter fleire dagar med kampar der SDF har mista eller forlate store område nordaust i Syria. Avtalen inneber også at styrkane i SDF skal integrerast i regjeringshæren, skriv Reuters.

Den syriske presidenten sit ved eit stort rundt bord og signerer ein avtale.

Raude halvmåne-senter påtent

Leiaren for den London-baserte eksilgruppa Syrian Observatory for Human Rights (SOHR) Rami Abdulrahman sa tidlegare måndag til det tyske nyheitsbyrået DPA at også han er bekymra for ei destabilisering av den nordaustlege delen av Syria viss IS-tilknytte fangar greier å rømme.

Samtidig ser regjeringshæren ut til å feste kontrollen i områda som kurdiske styrkar nå har forlate.

Journalistar frå Reuters melde måndag at medlemmer av Syrias tryggingsteneste og militærpoliti har etablert vegsperringar i Raqqa der dei sjekkar folks ID.

I tillegg er regjeringsstyrkar utplasserte ved olje- og gassanlegg i provinsen Deir ez-Zor, blant anna ved det største oljefeltet i landet al-Omar.

Samtidig skriv SOHR på nettsida si at eit kurdisk Raude halvmåne-senter i provinsen Hasaka har blitt plyndra og påtent, noko regjeringslojale stammekrigarar blir skulda for å stå bak.

Sjølvstyret krympar

Dei to siste vekene har regjeringa i Damaskus sett i verk ein større offensiv mot kurdiskkontrollerte område nord og aust i Syria.

Offensiven begynte ved og i storbyen Aleppo, der regjeringsstyrkar tok kontroll over to kurdiskdominerte bydelar.

Deretter fortsette offensiven austover og sørover, og i helga gjekk SDF med på å gi frå seg kontrollen over Raqqa og Deir ez-Zor. Byar og provinsar der fleirtalet av befolkninga er arabiske.

Byane var også viktige i kalifatet som IS oppretta under borgarkrigen.

SDF spelte ei avgjerande rolle for å nedkjempe IS og overtok i samband med kampane dei IS-kontrollerte byane. I offensiven fekk dei luftstøtte frå den USA-leidde koalisjonen, men sidan fallet til Assad-regimet har USA etablert samband med Syrias nye president og tidlegare opprørsleiar Ahmed al-Sharaa.

Dei kurdisstyrte områda har krympa kraftig dei siste dagane. SDF har framleis kontroll over Hasaka-provinsen, som blant anna omfattar den kurdiskdominerte byen Qamishli. Her har det kurdiske sjølvstyret administrasjonen sin.

I området ligg også dei største fengsla med fangar som blir skulda for å tilhøyre IS.