Herold

Demo vil ta livet av klikkjournalistikken, men har kort tid på seg til å finne 5000 betalingsvillige nordmenn. Om dei ikkje lukkast risikerer heile redaksjonen å stå utan jobb i februar.

Få nyhetsbrev fra Journalisten. – Vi har høyrt at nokon har sett på alarm tysdag klokka 05.50 for å bli grunnleggande medlem nummer éin, men om vi når målet er nervepirrande, innrømmer medstiftar Ingrid Tinmannsvik. No vil ho og gjengen i Demo lage ein nyheitsapp og nettstad, basert på danske Zetland sin prisvinnande teknologi. Tempoet skal ned og fokuset på nokre få dybdesaker om dagen. Heilt utan reklame. – Fiansieringsmodellen til mediene har gjort at vi av og til tek val basert på kva som pleaser annonsørane, meir enn kva som gir publikum forståing, seier ho. Ein redaksjon med tjue medarbeidarar i løpet av sommaren er målet, men for å få til dette treng dei økonomisk støtte frå folket – 5000 grunnleggande medlemmar innan 12. februar. – Kva skjer om de ikkje når målet? – I utgangspunktet står eg utan jobb da. Men eg har fått eit veldig håp dei siste månadene. Vi opplever enorm støtte. Lovar pengane tilbakeNo køyrer Demo ei kampanje der ein kan melde seg for ordinært årsmedlemsskap for 1900 kroner, 650 for studentar, eller så tilbyr dei eit siste alternativ med valfritt beløp ned til 400 kroner for personar i ein krevande livssituasjon. Etter kampanjen vil prisen gå opp. – Det er ein pris vi har rekna oss fram til, basert på løftet om dagleg dybdejournalistikk, men den er pressa ned så langt som mogleg og rimelegare enn kva konkurrentar tek i månadspris, forklarer Tinmannsvik. – Er det ikkje enklare å selje månadsabonnement? – Jo, vi håper å kunne tilby det, men det er sårbart i starten og vi treng nokre måneder på oss å kome i gang. Demo vil framleis motta støtte frå danske Zetland sjølv om dei når 5000, men målet er å bli økonomisk uavhengig så snart som mogleg. Tinmannsvik forklarar at alle som melder seg får eit personleg medlemsnummer og kan smykke seg med tittelen «grunnleggande medlem». Dei første medlemmane vil også få tilsendt eit diplom med namn og nummer. – Kor mykje vil prisen gå opp etter kampanjen? – Det må vi kome tilbake til, men nokre hundrelappar. Demo lovar medlemmane pengane tilbake dersom dei ikkje lukkast. Har nådd alle landets kommuner Innan nyttår hadde Demo eit mål om å få innspel frå personar i alle landets 357 kommuner. Det oppnådde dei klokka fire på nyttårsaften. – Takke vere ordførar Raymond i Grane kommune og ei kvinneleg kyrkjeverge i Hyllestad, seier Tinmannsvik. – Kvifor er dette viktig? – Vi meiner vel at ein del av journalistikken er litt for Oslo-fokusert, og at enkelte tema og historier rundt om i landet har vore underdekka. Derfor ville vi kome i kontakt med folk utanfor vår eiga boble og ekkokammer, dei skal vere med på å forme oss vidare. I september fortalte Tinmannsvik om kvifor ho valte å slutte i sin faste NRK-jobb for å satse på eit nytt norsk medie. Høyr Journalistens podkast: