Herold

Strand-Ulv sine U19-jenter gjekk heile vegen utan å tapa eit einaste sett. No ventar NM.

Dei raudkledde volleyballspelarane frå Hatlestrand, Ølve og Varaldsøy har for vane å slå hardt frå seg i dei aldersbestemte regionsmeisterskapa i Hordaland.

Helgas meisterskap, som gjekk av stabelen i Kvinnherad arena, var ikkje eit unnatak.

Strand-Ulv starta turneringa med å setja arrangør og naboar frå IL Trio på plass i den første gruppespelkampen laurdag føremiddag, og avslutta med å slå Rossvoll i finalen søndag ettermiddag.

Stressar ikkje

Totalt vart det fem strake sigrar i turneringa, utan at Strand-Ulv gav frå seg eit einaste sett.

– Dei er stabilt gode og i tillegg veldig rolege. I finalen låg vi under 20–24, men jentene blir ikkje påverka av det. I staden for å byrja å kava, så held dei seg rolege, er tolmodige og vel smarte løysingar. Og det gjekk bra i det settet, som dei til slutt vann 27–25, forklarer trenar Trine Sundfjord, som også skryt over arrangementet:

– Det var eit veldig fint arrangement. Kvinnherad arena har godt med plass, og er godt eigna for eit slikt arrangement.

Resultat Strand-Ulv JU19:

Som ferske regionsmeistrar er Strand-Ulv også kvalifisert for noregsmeisterskapen, som går av stabelen i Volda i mars.

– Det var viktig for oss å vinna i helga. Det betyr truleg at vi er seeda som nummer fem i NM. Vi kom på 5. plass i NM i fjor, då vi rauk ut mot Volda i kvartfinalen. Med betre seeding, så unngår vi kanskje å møta Volda i kvartfinalen denne gongen, seier Sundfjord.

Fekk det tøft

I tillegg til Strand-Ulv sitt jentelag, stilte arrangørane frå Trio med to lag i regionsmeisterskapen på heimebane. Gutelaget vart til slutt nummer åtte, etter å ha tapt mot Rossvoll, Askøy, Kvernbit, TIF Viking og Gneist.

Medan jentelaget til Trio vart nummer ni i turneringa, etter å ha tapt mot TIF Viking, Strand-Ulv, Sveio og Lyderhorn.

Strand-Ulv JU19