– Tekstleg feil om finansiering
I fylkeskommunen sitt forslag til reguleringsplan for ny fylkesvegtrasé mellom Austrepollen og Nordrepollen heiter det at prosjektet skal finansierast med overskotsmidlar frå Jondalstunnel-prosjektet. Det er feil, opplyser fylkeskommunen.
Hovudtiltaket i rassikringsprosjektet på fylkesveg 49 gjennom Mauranger er bygging av ein ny tunnel på om lag 3,5 kilometer mellom Austrepollen og Nordrepollen.
– Vil ha store negative konsekvensar, men rasfare veg tyngst
Det er i planomtalen nemnt at den totale investeringskostnaden kan koma opp i 750 millionar kroner.
– Prosjektet skal finansierast med overskot frå bompengeprosjektet Jondalstunnelen, blir det opplyst i både saksframlegg og planomtalen som plan, teknikk og miljøutvalet i Kvinnherad kommune får til handsaming neste veke.
Utvalet skal ta stilling til om forslaget skal sendast ut på høyring og offentleg ettersyn.
– Feil og skal vekk
– Du har heilt rett at det står i plandokumenta at tunnelen skal finansierast av overskotsmidlar frå Jondalstunnelen. Det eg kan sei, er at dette er feil. Her er det ein tekstleg feil i plandokumentet, fortel Øyvind Hauge Horge.
Han er seksjonsleiar i avdeling for infrastruktur og veg i Vestland fylkeskommune, og seier at Kvinnherad kommune no er varsla om at teksten som omhandlar finansiering skal vekk frå plandokumentet.
– Korleis overskotsmidlane skal nyttast, skal opp som eiga sak i fylkestinget. Når dette kjem på sakslista er eg ikkje kjend med per no, seier Hauge Horge.