No må du sikre lause gjenstandar igjen, for no blir det storm
Det er sendt ut gult farevarsel for kraftige vindkast i delar av Vestlandet frå natt til måndag.
Ifølge Meteorologisk institutt er det venta lokalt kraftige vindkast på 27–30 meter per sekund frå søraust, med liten til full storm på kysten og i fjellet. Det vil vere store lokale skilnader i vindstyrke.
Faren aukar frå klokka 01 natt til måndag 12. januar, og minkar igjen utover måndag ettermiddag.
Meteorologane åtvarar mot at lause gjenstandar kan blåse av garde, og rår folk til å sikre det som kan bli tatt av vinden. Det blir også åtvara mot ferdsel på utsette stader.
Fare for trafikkproblem og innstillingar
Kraftig vind og snøfokk kan føre til hindringar i trafikken, mellom anna ved at tre eller andre gjenstandar hamnar i vegbana. Nokre vegar og bruer kan bli stengde, og reisetida kan bli lengre enn normalt. I fjellet kan snøfokk gi redusert sikt og fare for kolonnekøyring eller stengde vegar.
Det er også fare for innstilte fly-, båt- og andre transportavgangar, og publikum blir rådde til å sjekke status hos transportaktørane.
Kan påverke straumforsyninga
Vindkast kan føre til straumbrot, til dømes dersom tre fell over leidningar. På sjøen og i strandsona blir det åtvara mot lokalt høge bølger, og folk blir bedne om å vise varsemd.
Farevarselet gjeld delar av Vestlandet og har gult nivå, som er det lågaste av dei tre faregradene.