Herold

Brannvesenet i Verdal håper politiet kan finne svaret på kvifor brannen plutseleg fekk ei kraftig utvikling.

– Me sit igjen og lurer på kva er det som gjer at brannen blir så kraftig?

Det spør brannsjef Håvard Bye i Innherred IKS.

– Det må ha skjedd noko.

Natt til onsdag omkom røykdykkarane Roger Kvello Hansen og Geir Otto Lein Johnson i jobben med å sløkke ein bustadbrann i Verdal.

Innleiingsvis blei brannen vurdert til å vere ein vanleg brann, utan stor spreiingsfare.

– Då blir det vurdert av mannskapet at her har me ei god mogelegheit til å gå inn og sløkke brannen.

Difor går fire røykdykkarar inn i huset for å sløkke brannen.

– Til eit eller anna plutseleg skjer, seier Bye.

To roser utanfor brannstasjonen i Verdal.

Fire røykdykkarar var inne i huset

Brannsjefen fortel til NRK at det blir sendt inn to par med røykdykkarar frå kvar si side av huset.

Men berre det eine paret kom seg ut igjen.

– Eit anna røykdykkarpar gjekk inn i huset frå ei anna side. Dei sat også med inntrykket at det var ein avgrensa brann, seier brannsjefen.

Etter kvart blei alle røykdykkarane kalla ut.

– Dei kjente at det ikkje var noko risiko, men trakk seg ut.

Samstundes som to av dei kjem seg ut, mistar mannskapet på utsida kontakten med dei to andre.

– Av mannskapa var det ingen som hadde ei anna oppfatning enn at her kan me gå inn og relativt enkelt sløkke brannen.

– Men det er då det må ha skjedd noko. Alle rutinar blei følgde, legg Bye til.

Brannen tok seg kraftig opp og det var ikkje mogeleg å ta seg inn for å hente dei to røykdykkarane.

Onsdag kveld blei dei funnen omkomne i brannruinane.

– No må me ta ein dag om gongen

På brannstasjonen i Verdal sit dei igjen med mange spørsmål, samstundes som dei sørger etter å ha mista to av sine nære kollegaer.

Dei to omkomne var deltidstilsette og blir beskrivne som dyktige røykdykkarar.

Blomar frå nær og fjern fyller brannstasjonen på Verdal.

I dagane etter brannen har brannvesenet motteke blomster og støtte.

– Det er rørande at det blir delt så masse omtanke og støtte. Det frå heile landet og også frå utlandet, seier Bye.

Brannsjefen seier dei er opptekne av å støtte dei nærmaste pårørande.

– No må me ta ein dag om gongen. Me må prøve å stå i det og bidra der me kan. Eg håpar at me klarer å stille opp for alle som treng oss.

Håper å få svar på kva som skjedde

Politiet etterforskar brannen i to spor – sjølve brannen og arbeidsulukka.

– Det er for tidleg å seie noko om årsaka til brannen og til dødsfalla. Me er framleis tidleg i etterforskinga av denne tragiske hendinga.

Det seier etterforskingsleiar Therese Raaken Bykvist i Trøndelag politidistrikt.

– Det som er så bra er at politiet set på så mange ressursar for å få oppklart dette, kommenterer Bye.

Han håper etterforskinga vil gje svar på kva som skjedde og kvifor brannen plutseleg blei så kraftig.

– Eg set mi lit til at politiet nøstar opp i dette og at me får svaret på kva som har skjedd.

Blomar frå kollegaar i Drammen.

I tillegg har Arbeidstilsynet sett saman eit tilsynsteam som skal undersøke kva som kan vere årsaker til ulukka.

– Hensikta med tilsynet er å lære slik at me i framtida kan førebygge liknande tragiske ulukker, seier avdelingsdirektør i Arbeidstilsynet, Torgeir Moholt.

– Og så må me vere opne, samle all informasjon og bidra med det me kan, legg brannsjefen til.