UP-fangst: Traktor på gangveg og bil utan hjul
Torsdag kveld var travel for Utrykkingspolitiet, med to hendingar som begge enda med politisak.
I 19-tida torsdag kveld fekk politiet melding om ein traktor som køyrde på ein gangveg på Rossland. Ein patrulje rykka ut, og føraren – ein mann i 30-åra – blei stoppa.
Ein blåsetest på staden gav utslag.
– Det blir oppretta sak på ruspåverka køyring og køyring utan gyldig førarkort, fortel politistasjonssjef Julie Ekeland.
Seinare same kveld blei UP kalla ut til Frekhaug etter melding om ein bil som hadde mista eit hjul.
Då patruljen kom til staden viste det seg at bilen var utstyrt med sommardekk på det glatte føret, og føraren blei i tillegg mistenkt for å ha køyrt i ruspåverka tilstand.
– Føraren blei tatt med for blodprøve, og det blir oppretta sak for køyring i ruspåverka tilstand, seier Ekeland.