Herold

SKRÅBLIKK av Jan Per Styve.

Det som ikkje skjer, kan vere like viktig som det som skjer

Det som er gjort — er viktigare enn det som ikkje er gjort

Halvgjort arbeid er også arbeid

Etterpåklokskap er betre enn ingen klokskap

Det kunne vore verre – men det kunne også vore betre

Når alt håp er ute, gjeld det å ikkje sitje inne

Eit steg attende når du går i feil retning, er eit steg i rett retning

Dobbeltmoral er betre enn ingen moral

Enten går det over, eller så blir det verre

Gle deg på førehand — då kan du få dobbel glede

Gi opp i dag – i morgon kan det vere for seint

Du kan gjerne vere einig med kona, men då tar de feil begge to

På deg sjølv kjenner du ingen andre

Du har ikkje prøvt alt sjølv om du har prøvt tre gongar

Bensinen er alltid billigast når du nett har fylt tanken

Ikkje alt som tel kan teljast – og ikkje alt som kan teljast tel

Den siste dråpen har ikkje all skuld for at det renn over

I politikken er alt mogeleg – i alle fall før valet

Det er ikkje nok å stå opp om morgonen, du må vakne også

Det er aldri for seint å lære noko nytt – så du kan gjerne vente til neste år

Pass deg når nokon seier at de er i same båt — det betyr at han vil styre mens du må ro

Den som ler sist er oftast den som har forstått minst

Du finn alltid det du leitar etter på den siste plassen du leitar

Den enklaste måten å sikre at du blir skikkeleg gamal – er å ta tida til hjelp

Når det er på tide, er det ofte for seint

Dette året skal du vere deg sjølv, og håpe at det er nok

Om du meiner du har lest noko av dette før, så er hugsen din brukbar. Den hugsar seks år attende. Hugsar du ingenting, så har du ledig kapasitet til å hugse mykje i 2026.

Godt nytt år!

janperstyve@gmail.com