Ferdig som kjøpmann: – Eg følte det var på tide
Andreas Berge (35) har valt å ikkje fornya kontrakten sin med Bunnpris Husnes.
Sidan 2021 har Andreas Berge drive Bunnpris Husnes. I år vil han ikkje fornya kontrakten sin med lokalbutikken.
Mellom anna ønsker han å bruka meir tid saman med dottera.
– Ho er snart fire år, så ho byrjar å bli litt irritert over at eg er borte så mykje. Det blir ofte lange dagar når folk er sjuke og ein ikkje har folk til å dekka vakter og så vidare.
Det var Grenda som først omtalte saka.
Pendlar frå Odda
Berge bur sjølv i Odda, og pendlar kvar dag til butikken på Husnes. Det har han ikkje noko imot.
– Nei, det er ikkje noko problem. Du veit, eg har køyrt denne vegen her sidan dei heldt på å byggja den nye biten frå Ænes og vidare innover i begge retningar. Eg brukar litt over ein time, i forhold til to-tre timar éin veg før. Det er ikkje noko problem.
– Kvifor har du teke denne avgjerda no?
– Eg følte det var på tide. Eg har halde på med dette ganske lenge no.
Siste året
Tida som kjøpmann på Husnes vil han hugsa som lærerik, men òg krevjande.
– Det er jo mykje ansvar. Personalansvar og å prøva å passa på at vi har varer her i butikken og så vidare.
Kontrakten går ur i løpet av 2026. Kva han skal gjera vidare er enno ikkje heilt sikkert.
– Det står att å sjå, men eg er framleis ønskt i Bunnpris-systemet, så det blir nok sikkert litt rundt omkring, tenkjer eg. Eg har ikkje så veldig mange store planar akkurat no.