Herold

Etter at kommunestyret i september 2025 vart gjort kjent med den alvorlege økonomiske situasjonen Helse Førde står i og dei drastiske kuttforslaga administrasjonen la fram for styret i Helse Førde, har Lærdal og heile regionen kjent på ei uro og bekymring. Ei uro og bekymring for dei konsekvensane som vil følgje om kuttforslaga vert realiserte.

Tap av kompetansearbeidsplassar, tap av helsepersonell, fråflytting, rekrutteringsutfordringar, legemangel, konsekvensar for næringsliv og samfunnsliv, utryggheit for innbyggjarane i hht pasienttilbod, akuttilbod og lengre og utfordrande (fjell og fjordkryssing) reiseveg for å nemne noko.

Ved å leggje ned ortopedisk avdeling og ta bort skadepoliklinikken og operasjon ved Lærdal sjukehus, vil det påverka tryggleiken og sikkerheita vår. Landbrukskommunen Lærdal ligg sentralt til med store turistkommunar rundt som Aurland/ Flåm, Hemsedal og Valdres, og dessutan regionsenteret Sogndal med sine studentar og ein kommune med eit folketal i vekst.

Inst i Sognefjorden ligg industribygda Årdal ein tungvektar innan aluminiumsproduksjon. Både Årdal, Luster, Lærdal og Aurland er rike på kraftresurssar, og me har gode knutepunkt ut av regionen med stamvegen E16 over Filefjell austover, E 16 vestover mot Voss og Bergen, R 52 over Hemsedal, R 55 Sognefjellsvegen, Flåmsbana og ikkje minst Sognefjorden som ferdselsåre.

Om sommaren har me turistvegen over Aurlandsfjellet og Årdal – Turtagrø mot Sognefjellet. Alt dette legg grunnlaget for at me treng eit nært sjukehus med alle dei viktige og grunnleggjande funksjonane som det har i dag, for å tryggje kvardagen og sikre livsgrunnlaget og utvikling i denne viktige regionen, både i fredstid og eventuelt i krig.

Eg har no sagt noko om innbyggjarane, ressursane, infrastrukturen i denne regionen som trass i lange avstandar og kronglete vegar og fjellovergangar har klart å blitt knytt saman gjennom ein felles bu- og arbeidsregion. Me pendlar på kryss og tvers for å halde liv i bygder og grender og sikre utvikling og berekraft.

Når me blir presentert for så alvorlege kuttforslag som rører ved denne tryggleiken og sikkerheita vår vekkjer det sterke kjensler. No står ein heil region samla for å kjempe for det me har og overtyde makta i Oslo at de må stoppe i tide og sikre tryggleiken vår.

Me er klar over at Helse Førde har store utfordringar knytt til den økonomiske situasjonen men me kan ikkje leggje ned for så å byggje opp att, då er skaden allereie skjedd og heile regionen har fått ein knekk det vil ta lang tid å byggja opp att. Lærdal sjukehus er eit veldrive sjukehus, med funksjonar som har godt renome og som kan ta unna ventelister og gje trygg og god oppfølging.

Her er det tre timar til Førde sjukehus for oss på sørsida av Sognefjorden og i underkant av to timar til Voss sjukehus. Me forstår tanken om sentralisering men det må ikkje gå på kostnad av innbyggjarane, og ein må og ha med reiseveg i dei tankane. Lang og krevjande reiseveg kan vere forskjellen på liv eller død.

Som lokalpolitikar i Lærdal har dette vore ei svært tøff og krevjande tid. Me er redde og uroa for kva dette vil seie for oss og kommunane rundt oss. Lærdal sjukehus er sjølve berebjelken i kommunen vår og ei tryggleik og sikkerheit for kommunane rundt.

Me har krevjande tider i møte med strammare kommuneøkonomi, utfordringar i hht rekruttering av legar og anna helsepersonell, me har satsa stort på barn og unge og har store investeringsprosjekt på gang innan pleie og omsorg. Lærdal kommune er og i gang med eit flaumsikringsarbeid som krev store ressursar, me merkar og utfordringane innan ulike næringar, dyrtid og ei oppgradering av Lærdalstunnelen som vil føre til avgrensa infrastruktur vestover.

Me ber dykk om å stanse dei føreslegne kutta administrasjonen legg fram for styret i Helse Førde. Skal ein framleis sikre verdiskaping i heile landet treng me sjukehus nær folk.

1. januar 2026 mobiliserer me til aksjon framfor Stortinget. Fleire bussar med sogningar tek turen til hovudstaden for å vise dykk på Stortinget kor viktig sjukehuset er for oss.

Eg håpar så mange av dykk set av tid til å møte oss og snakke med oss. Mange er motlause og oppgjevne over sentrale politikarar. Eg har stor tru på at de ser og gjer det de kan for å sikre vidare verdiskaping, tryggleik og beredskap for oss som er omgjeven av lange avstandar, fjordar og fjell som dei som bur i meir sentrale strøk.