Svilukt og grå røyk frå sentrumsbygg i Førde
Pågåande rettssak måtte bli stoppa. Elektrisk apparat ovder ei himling skal ha tatt fyr.
Det blei merka svilukt og sett grå røyk frå kjellaren i Tinghuset, der og Norec held til, i Førde sentrum, onsdag ettermiddag.
– Det er ukjend kor røyken kom ifrå, men det skal ikkje ha blitt observert opne flammar. No er brannvesenet inne i bygget for å sjå kva dei finn, seier innsatsleiar i Sunnfjord-politiet, Sturla Iman, til Firda på staden i 16-tida.
Det blei evakuert fleire titals personar frå bygget då og brannalarmen gjekk. Ei rettssak blei avbrote.
– Vi fekk melding frå politiet om at brannalarmen hadde gått og at folk var begynt å evakuere, seier vaktkommandør, Shahrooz Lahooti i 110 Vest, like etter meldinga.
Brannvesenet fekk tidleg melding om både svilukt og grå røyk frå kjellaren i bygget.
– Brannvesenet på staden melder om litt svilukt, men ikkje så mykje røyk, seier han.
I 17-tida fortel Lahooti at dei har funne årsaka:
– Det har vore branntilløp i noko elektrisk over ei himling. Kvifor veit vi ingenting om, seier han.
Sidan det var i elektronikk over himling tok det noko tid å finne ut kor røyken kom frå, men det var slokke då brannveset kom til.
Det skal ikkje vere skadar av betydeleg omfang, og Lahooti beskriv hendinga som udramatisk.