Eidfjord opnar for torghandel på ny plass: Strenge krav til infrastruktur og matsal
Eidfjord kommune opnar for torghandel i 2026 med klare rammer, som mellom anna gjeld mangel på infrastruktur, avgrensa matsal og eit særskilt fokus på lokale, opplevingsbaserte tilbod.
For drifta på den sentrale torgplassen i 2026 har Eidfjord kommune lagt fram særskilde retningslinjer. Det blir tydeleg presisert at infrastruktur for salsbuer ikkje vil bli etablert.
– Kommunen vil ikkje etablera eller tilby infrastruktur knytt til vatn, straum, sanitære anlegg eller tilsvarande for torghandelen i 2026, heiter det i retningslinjene frå Eidfjord kommune.
Dette betyr at berre mobile salsbord og vogner, uavhengige av slik infrastruktur, kan driva utsal. Seljarane må sjølv syta for avfallshandtering; eigne bosskonteinarar er ikkje tillatne, og næringsavfall må handterast via verksemda sine eigne ordningar.
Særlege avgrensingar gjeld for mat og drikke.
– Sal eller servering av mat og drikke som føreset tilgang til vatn, straum eller hygienefasilitetar vil ikkje vera tillate på torgplassen i sesongen 2026, slår kommunen fast.
For å fremje mangfald og variasjon vil kommunen ved tildeling av plassar prioritere tilbod med opplevingsbasert karakter, lokal verdiskaping og tydeleg lokal forankring
Torghandelen kan føregå mellom klokka 08:00 og 23:00. Mobil salsvogn kan stå på tildelt plass i 24 timar, men må flyttast om den er stengt meir enn éin kvardag eller på laurdag. Leigebevis og gyldig salsløyve må vera synleg.
Kommunen har fastsett prisar for leige av plass, avhengig av storleik og periode. Interesserte må sende inn ein søknad med informasjon om kva dei ønskjer å selja og for kva tidsrom. Fristen for å søkja er 15. februar 2026.