Herold

Eidfjord kommune fekk måndag melding om at byggentreprenøren Markhus Bygg AS melder oppbod. Konkursen skapar utfordringar for tilbygget til Eidfjordhallen, men kommunen har teke forholdsreglar og vil no arbeida for å sikra ferdigstilling av prosjektet.

Måndag 5. januar fekk Eidfjord kommune melding frå byggentreprenøren Markhus Bygg AS om at selskapet vil melda oppbod. Kommunen understrekar at dei har teke forholdsreglar for å handtera følgjene av konkursen, som råkar prosjektet med tilbygg til Eidfjordhallen.

– Kommunen har sikra seg så langt råd er mot konsekvensane av ein konkurs gjennom gjeldande kontraktar og garantiordningar, seier Eidfjord kommune i ei melding på nettsida si.

Konkursen i Markhus Bygg AS, som råkar rundt 100 tilsette i Bergen, kjem etter at styret har vedteke å melda oppbod. Selskapet opplyser i eit kundebrev at eit uventa momskrav frå Skatteetaten vart den utløysande årsaka. Kravet, som gjeld for tida før selskapet gjennomførte ein rekonstruksjon i mai 2025, vart ikkje akseptert som del av akkorden. Styret valde oppbod for å unngå ytterlegare tap for kreditorane, heiter det i brevet.

Samstundes som dei 100 tilsette mister jobben, set Eidfjord kommune i gang nødvendige prosessar for å få tilbygget ferdigstilt.

Dei viktigaste gjenståande arbeida på tilbygget inkluderer ventilasjonsarbeid, elektriske installasjonar, innvendige overflater, rørleggjararbeid og arbeid utomhus.

Dagleg leiar Kaya Markhus uttrykkjer eit håp om at deira kompetanse framleis vil vera etterspurd.

– Byggmester Markhus har dyktige tilsette og vi håper inderleg at det vil vera behov for deira kompetanse, slik at det løyser seg best mogleg og raskast mogleg for alle, seier ho til BA.

Eidfjord kommune publiserer ny informasjon når vidare framdrift er avklart.