– Det kjem til å halda seg på minus lenge
Prognosane seier ein kan koma ned i -20 grader på Vangen.
Sesongens kaldaste temperatur på Vossevangen så langt kom natt til sundag, då ein var nede -16,6 grader.
På dagen måndag er ein nede i -12,8 grader medan Hordaland tek telefonen til meteorologen.
– Det er ei ganske kald tid, stadfestar Mette Skjerdal, vakthavande meteorolog.
Ho fortel at me er inne i ein kald og turr periode, og at denne ser ut for å vara ved ei lengre stund.
– Kor kaldt kan det verta?
– Det er litt usikkert, det kan koma endå litt kaldare vêr. Prognosane seier enn så lenge at temperaturen kan falla ned til mellom -15 og -20 grader.
Ho forklarar mellom anna at vinden spelar inn om kaldt det vert.
– Om det er vind i lufta, så er ikkje lufta så mykje i ro, og då vert det ikkje så kaldt. Ein har også lokale forskjellar i små kuldegroper.
Enn så lenge ser det ut for at det vert litt mildare att mot slutten av veka.
– Men temperaturen kjem til å halda seg på minus lenge.
Vêrmelding Voss