Herold

Debattinnlegget til Sveinulf Vågene teiknar eit bilete av eit kommunestyre som lyg, rundlurer veljarane og raserer naturen utan etikk og ansvar.

Les innlegget her: Bremanger kommune på ville vegar

Det er sterke skuldingar, og nettopp difor er det viktig å rydde i fakta, ansvar og prinsipp.

For det første:

Bremanger kommune har ikkje vedteke å byggje vindkraftverk. Kommunestyret har vedteke å opne for utgreiing av mogleg vindkraft i nokre område. Ei utgreiing er nettopp det ordet seier: ei undersøking.

Ho skal gi kunnskap om konsekvensar for natur, landskap, friluftsliv, kulturminne, nærmiljø og lokalsamfunn – og ho skal gi grunnlag for å seie ja eller nei seinare. Å framstille dette som ferdig avgjort utbygging er feil.

For det andre:

Det blir hevda at politikarane har brote vallovnader. Valkamp og politiske svar i valgomatar handlar om haldningar og retning – ikkje om å stenge døra for all framtidig kunnskap. Å vere ansvarleg vald politikar betyr å ta avgjerder på grunnlag av oppdatert informasjon, endra rammevilkår og heilskaplege vurderingar, også etter eit val. Alternativet er å fryse politikken fast – uavhengig av nye behov, nye krav og nye moglegheiter. Det tener verken demokratiet eller innbyggjarane.

For det tredje:

Samanlikningar med nashornjakt, potensmiddel og moralsk forfall bidreg ikkje til ei opplyst samtale. Dei polariserer og sår mistillit. Bremanger-politikarar er ikkje kyniske naturøydeleggjarar. Vi er folkevalde som kvar dag må balansere naturvern, næringsutvikling, arbeidsplassar, kommunale tenester og framtidsutsikter for ein kommune som – som mange andre – står i hard konkurranse om både folk og ressursar.

Bremanger har ein vedteken samfunnsplan som blant anna seier at vi skal nytte dei naturgitte fortrinna våre til vekst og utvikling, samtidig som vi tek vare på natur, miljø og lokalsamfunn. Det er nettopp dette spennet ei utgreiing skal belyse. Utan kunnskap tek vi ikkje gode avgjerder – korkje for eller imot.

Når det gjeld økonomi og skulebygg:

Ja, Bremanger har hatt gode driftsresultat dei siste åra, og det er bra. Men ansvarleg økonomistyring handlar ikkje berre om dagens overskot – det handlar om langsiktig berekraft, investeringar, demografi, vedlikehald og framtidige inntekter. Å sikre gode skular, trygge tenester og attraktive lokalsamfunn krev meir enn éin budsjettperiode.

Til slutt:

Eg deler engasjementet for naturen. Eg forstår uro og motstand. Det skal vere rom for usemje, kritikk og sterke meiningar. Men eg kan ikkje stille meg bak ei framstilling der politiske motstandarar blir skulda for løgn, svik og moralsk forfall fordi dei tek ansvarlege, lovlege og demokratiske steg for å skaffe kunnskap før avgjerder blir tekne.

I Bremanger flyttar vi ikkje «gjerdestolpane» for etikk og demokrati. Vi står støtt i dei – også når debatten er krevjande.