Dårleg nytt for nyttårsaftan, men gode nyhende for dei skiglade
Plus
Til helga kan temperaturane koma heilt ned i minus 20 grader. – Då blir det ulljakke, ingen tvil om det, seier meteorolog Leonidas Tsopouridis.
Årets siste dag er her, men vakthavande meteorolog Leonidas Tsopouridis har ikkje den mest lystige meldinga å koma med for nyttårsvêret.
– Det blir litt vått. Det store spørsmålet er om det blir våt snø eller sludd.
Smartembed for https://www.avisa-hordaland.no/api/graff/v1/component/enkel-biografi?id=453703
Nedbøren vil ifylgje meteorologen starta ut som snø, men mot kvelden og midnatt kan temperaturane bikka over til plussgrader.
– Den største utfordringa i kveld blir nedbør, og at det blir relativt lågt skydekke.
Med andre ord ser det ikkje veldig lovande ut for deg som ynskjer å sjå fyrverkeri ved midnatt.
– Det blir litt dårleg utsikt. Det ser ut til at det kan bli litt meir bygevêr rundt midnatt. Er me er heldige kan det bli litt lettare vêr, men stort sett er det nedbør og dårleg sikt som gjeld.
– Veldig kaldt
Har du ordna deg med langhelg og er glad i å gå på ski, ser derimot meldinga derimot ganske så lystig ut. Men det gjeld å kle godt på seg, for no blir det jammen meg kaldt!
– Torsdagen byrjar med snøbyer, så ser det ut til å bli opphaldsvêr frå føremiddagen. Temperaturane byrjar gradvis å gå ned frå torsdag kveld. Det blir litt glimt av sol i løpet av føremiddagen og ettermiddagen, seier Tsopouridis.
Frå torsdag kveld går me inn i ei lengre periode med ordentleg kaldt ver.
– Det kan bli veldig, veldig, veldig kaldt!, seier meteorologen som melder om at gjennomsnittstemperaturen gjennom helga vil liggja rundt minus 15 grader.
– Dei fleste område natt til laurdag og sundag vil temperaturen liggja mellom minus 10 og minus 20 grader. Då blir det ulljakke, ingen tvil om det!
No kjem snøen
Kler du godt på deg, kan utsiktene for ein god dag i skibakken vera gode.
– Kva trur du om skiforholda i helga?
– Eg trur faktisk det blir veldig gode skiforhold dei neste dagane. Det kjem nysnø - og låge temperaturar etterpå.
Meteorologen fortel at det vil vera lokale variasjonar, når det kjem til kor mykje nedbør som vil koma som snø.
– I fjellet over 500 meter kan det koma opptil 20 centimeter nysnø, til og med torsdag ettermiddag.
Neste veke ser det ut til å koma endå meir snø til Voss.
– Det er sannsynleg at det kan koma endå meir snø i løpet av neste veke. Eg trur det er gladnyhende for dei som elskar å gå på ski, rundar meteorologen av.