Herold

Det vart ei vond avslutning på året for matmor Randi Helene. Ho håpar at ingen andre lir same skjebne som Max (2).

Saka oppsummert:

• Hunden Max (2) døydde muligens av hjertesvikt etter å ha blitt skremt av ulovleg fyrverkeri.
• Eigaren Randi Helene Dyngedal Bakke fann hunden død i skogen etter å ha leita desperat.
• Fyrverkeriet skjedde utanfor nyttårsfeiring.
• Facebook-posten hennar har fått stor merksemd, med fleire tusen likerklikk og delingar.
• Bakke ønskjer å advare andre hundeeigarar om farane ved fyrverkeri, spesielt ulovleg bruk.

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

– Han har nok sprunge seg i hel.

Det seier Randi Helene Dyngedal Bakke til NRK dagen etter at hunden vart funnen død i skogen.

Tidlegare same kveld skulle ho og ein ven gå ein idyllisk måneskinstur med hunden Max (2) i friluftsområdet på Burøya i Arendal.

LEI SEG: Randi Helene Dyngedal Bakke gler seg ikkje til nyttårsfeiringa.

Der såg dei ein bil komme i mørket.

Like etterpå small det frå fyrverkeri i lufta.

– Han såg på meg og så sprang han, fortel Bakke gråtkvelt om hunden.

Max var i langline, men laus akkurat då fyrverkeriet small.

Bakke fortel at ho var i kontakt med politiet som sa det ikkje var noko lovleg fyrverkeri i området.

NRK har også sjekka dette med brannvesenet.

Eigaren har førebels ikkje meldt saka til politiet.

Slik førebur hundeeigarar seg til nyttårsaftan:

Bad om hjelp

I eit desperat forsøk på å finne hunden tok ho til sosiale medium for å finne Max.

– Han var min beste venn, fortel ho om golden-doodelen sin.

Bakke beskriv Max som ein snill og litt bortskjemt hund. Han var ofte med på jobben som miljøterapeut for vanskelegstilt ungdom.

– Han var ein sånn gledesspreiar mot alle. Han gjekk alltid i hælane på meg og dilta etter. Hadde nokon ein dårleg dag eller var lei seg, så var han den første som skulle trøyste.

LEIK: Max blir beskriven som ein leiken hund.

Truleg blei hunden så redd at han sprang seg i hel, meiner Bakke.

– Eg fann han med tunga ut av munnen og han var heilt blå. Det er eit teikn på hjartesvikt. seier ho.

Nå vil ho åtvare andre før nyttårsfeiringa.

Facebook-posten hennar har fått stort engasjement og har fleire tusen likarklikk og er delt over 550 gonger.

Randi Helene Dyngedal Bakke tok til Facebook for å spørje om hjelp. Posten har fått over 2800 likarklikk.

Dei siste åra har fleire teke til orde for å gjere privat fyrverkeri ulovleg.

Ein underskriftskampanje kalla «Nei til fyrverkeri» har i skrivande stund over 60.000 underskrifter.

Gruar seg

Bakke fortel at ho hadde teke alle forholdsreglar rundt nyttårsfeiringa og hadde planlagt å reise til fjells der det er lite fyrverkeri.

– Det er vanskeleg å gardere seg mot ulovleg fyrverkeri.

Veterinær Anna Nordstrand i Mattilsynet hadde lese om hunden då NRK tok kontakt og er tydeleg på at ho synest det er ei tragisk sak.

Ho seier det er sjeldan at hundar spring seg i hel, men utelukkar det ikkje.

– Det kan tyde på organsvikt, seier Nordstrand om den blå tunga.