Herold

Jærbanen er eit av landets mest trafikkerte jernbanestrekk. Eit nytt dobbeltspor mellom Nærbø og Skeiane kan auka kapasiteten, men så langt er det lite som tyder på at Stortinget vil løyva pengar til dette med det første.

Peiker på fleirtalspartia

MDG prioriterer Ålgårdbanen

5,8 millionar passasjerar

Onsdag la KrF sin finanspolitiske talsperson, Jørgen Kristiansen, fram partiet sitt alternative statsbudsjett for neste år. Der har dei blant anna sett av 90 millionar kroner til å styrka arbeidet med fornying av Sørlandsbanen og nytt dobbeltspor på Jærbanen.

Det er ganske langt unna dei totalt 14 milliardane dobbeltsporet er venta å kosta, men pengane kan likevel komma godt med til neste steg, som er detaljregulering av strekket.

Då Venstre la fram sitt alternative statsbudsjett i førre veke, hadde dei sett av 200 millionar kroner til planlegging av jernbane i Noreg. Blant prosjekta som var konkret nemnt, var dobbeltspor mellom Skeiane og Nærbø.

Dette er dei førebelse planane for dobbeltsporet på Jæren

I ein kommentar til Jærbladet, seier Hå-ordførar Andreas Bjorland (KrF) at han håper Ap-regjeringa og støttepartia SV, Senterpartiet, MDG og Raudt kjenner seg utfordra til å følga opp.

Då regjeringa la fram sitt forslag til statsbudsjett i oktober i år, føreslo dei å løyva meir pengar til tog som skal settast inn på Jærbanen mellom Stavanger og Sandnes, men dei har ikkje sett av pengar til å planlegga ei forlening av dobbeltsporet sørover frå Sandnes.

Men Arbeidarpartiet har ikkje fleirtal aleine, og er nå i forhandlingar med SV, Senterpartiet, MDG og Raudt om eit statsbudsjett dei som fleirtal kan einast om.

I utgangspunktet skal forhandlingane vera ferdige sundag denne veka, men ting tyder på at veka kan verta lang.

Mandag kalla MDG inn sentralstyret til krisemøte om forhandlingane, og tysdag sa SV sin forhandlar Marthe Hammer til VG at partia står langt frå kvarandre i ei rekke saker.

– Det er veldig krevjande forhandlingar, sa Hammer til VG.

Om partia som står midt oppe i desse forhandlingane vil følga ordførar Bjorland si oppmoding gjenstår å sjå, men ein gjennomgang av dei alternative statsbudsjetta til Arbeidarpartiet sine forhandlingspartnarar tyder ikkje på det.

Raudt har i sitt budsjett sett ein halv milliard til vedlikehald og fornying av jernbanen. I tillegg vil dei bruka 70 millionar kroner på å planlegga nye jernbanestrekningar, utan at desse vert nærare spesifisert.

SV har i sitt alternative budsjett sett av rundt ein milliard kroner til jernbane. Mesteparten av dette skal gå til vedlikehald. Partiet har sett av hundre millionar kroner til Ringeriksbanen.

Ringeriksbanen er eit prosjekt som allereie ligg inne i Nasjonal Transportplan, som er Stortinget sin langsiktige plan for pengebruk på norske infrastrukturprosjekt.

SV har i sitt alternative statsbudsjett ikkje funne rom for planleggingsmiddel til dobbeltspor på Jærbanen.

Det har heller ikkje MDG, trass i at dei vil satsa heile 1,8 milliardar på jernbane. Fleire prosjekt er nemnt, men dobbeltspor på Jærbanen er ikkje blant dei.

Det er derimot Ålgårdbanen. MDG vil bruka 20 millionar kroner på å starta arbeidet med gjenopning av denne.

Ut over 30 millionar kroner til å redusera billettprisane på delar av Trønderbana, har ikkje Senterpartiet sett av pengar til å satsa på jernbane i sitt alternative budsjett.

Dét sagt, så har heller ikkje KrF og Venstre sin føretrekte samarbeidspartnar, Høgre, funne pengar til dobbeltspor på Jærbanen.

Høgre la fram sitt alternative statsbudsjett tysdag denne veka. Dei har sett av 30 millionar kroner til planlegging av dobbeltspor mellom Sandefjord og Stokke, eit prosjekt som i motsetnad til Jærbanen mellom Nærbø og Skeiane allereie ligg inne i Nasjonal Transportplan.

Framstegspartiet har så langt ikkje lagt fram eit alternativt statsbudsjett.

Ei utviding av det dobbeltsporet som i dag går mellom Stavanger og Skeiane i Sandnes, kan føra til fleire togavgangar og auka kapasitet, både på gods og passasjerar.

Jærbanen er i dag ein av dei fem mest trafikkerte jernbanestrekningane i landet. I fjor var det 5,8 millionar passasjer som tok toget her. Dette talet er venta å veksa ytterlegare.

Kommunane som ligg langs Jærbanen har, saman med Rogaland fylkeskommune og Næringsforeningen i Stavanger-regionen, tatt initiativ til eit samarbeid som skal påverka stortingspolitikarane til å løfta Jærbanen høgare opp på prioriteringslista.

Den kommunale kronerullinga for dobbeltspor over Jæren er i gang

Toget fra Stavanger til Bryne tar åtte minutter lengre tid enn i 1994

– Eg er eigentleg litt skuffa

Skuffa: – Dobbeltsporet er dødt

Null kroner til dobbeltsporet på Jærbanen