Herold

Det var trist å lesa rådmannen sin kommentar til Ingvill Humlebrekke der hennar innspel igjen vert lite verdsett. Humlebrekke var hovudansvarleg lege ved Voss Sjukeheim i to år, og freista ta tak i utfordringane ho såg. Ho var motivert for å bli geriater. Spesialiteten geriatri tek for seg ei heilskapeleg tilnærming til eldre pasientar og omfattar behandling av alt frå akutte sjukdommar og hjerneslag til rehabilitering, førebygging og lindrande behandling ved livets slutt. Tenk om Voss herad no seks år seinare (omlag like lang tid som det tek å bli spesialist) hadde hatt ein geriater tilsett i eigen organisasjon? Ei som budde på Voss og som hadde høg kompetanse i geriatri. Alternativet veit me har vorte svært dyrt.

Politikarane får stadig høyra at det er så vanskeleg å rekruttera og halda på fagfolk. Det er dette som er sjølve grunngjevinga for sentralisering og større einingar. Problemet gjeld både fagarbeidarar, sjukepleiarar, pedagogar og legar. Eg lurer på kvifor det er så vanskeleg å rekruttera og behalda på Voss? Her bur me i den beste bygda i verda. Mange ynskjer seg tilbake etter studier, og me er vidkjende for vår natur, kultur, idrett og ekstremsport. Voss har eit særs godt omdøme.

Voss har også nokre store fordelar når det gjeld rekruttering av nettopp legar. Kvart einaste halvår kjem det to nye turnuslegar frå Voss Sjukehus til Voss Herad. Kva gjer Voss Herad for å rekruttera og halda på desse? Det burde ikkje vera mangel på legar i Voss Herad når det kvart halvår kjem to nye! Og når det gjeld privatpraktiserande fastlegar, så manglar det heller ikkje legar. Dei har stabil drift og liten eller ingen bruk av vikarar. Fastlegekrisa er over for dei privatpraktiserande legane på Voss. Kvifor?

Etter fastlegekrisa styrka Voss herad vilkåra for dei privatpraktiserande legane. Dette skjedde etter langvarig arbeid overfor heradet frå mellom anna legane Knut Erik Eliassen og Rønnaug Een. Dei var også innom heradsstyret og orienterte om høgt arbeidspress og låge søkartal til ledige heimlar.

Initiativet enda med at politikarane i 2022 gjorde fleire vedtak for å betra situasjonen: gjenkjøpsgaranti for heimlar, avspasering med praksiskompensasjon etter legevakt og forsterka basistilskot. I tillegg har ein no legevaktordning på dagtid der dei privatpraktiserande legane ikkje deltek, og dei privatpraktiserande har heller ingen plikt til kommunale oppgåver (som t.d tilsynslege på sjukeheim). Dei privatpraktiserande legane fekk altså etter fastlegekrisa mykje betre vilkår i Voss Herad, og det er bra! Dei er ein svært viktig del av helsetenestene til heradet.

Men kva med dei kommunale legetenestene? Kvifor er det framleis så stor vikarbruk og store kostnader her? Dei tre kommunalt tilsette legane som stod fram i avisa sa noko av det same som Humlebrekke: Høyr på oss og snakk med oss. Medverknad og innspel vert ofte etterlyst, men i dei kommunale legetenestene er det visst ingen som høyrer etter?

Ein skulle tru at dersom ein høyrer på dei tilsette og syter for gode vilkår - så vil dei bli verande. Dette viste seg i alle fall å stemma for dei privatpraktiserande legane. Å investera i faste tilsette vil på sikt spara heradet for store summar i vikarbruk*. *Voss er ein attraktiv stad å bu. Det bør også vera attraktivt å vera kommunalt tilsett på Voss.

– Å ropa til døve øyre: Ingvill fortel om å kjenna seg usynleg i helsevesenet på Voss

Fastlegar syng ut: – Undrar oss over korleis dei kan la pengane renna ut over så lang tid

Har brukt 39 legevikarar på tre år ved kommunalt legekontor: – Det er heilt vilt