Herold

LESARINNLEGG: I ei tid der mange kommunar, inkludert vår eigen, må prioritere hardt, er det viktig å løfte fram val som bidreg til aktivitet, arbeidsplassar og framtidstru. Bruken av næringsfondet i Vaksdal er eit godt døme på nettopp dette.

Næringsfondet skal nyttast til å fremje næringsaktivitet i kommunen, gjennom å leggje til rette for nye arbeidsplassar, vidareutvikling av eksisterande verksemder og nye tenestetilbod. I november valde eit samla formannskap å løyve over 2,4 millionar kroner til søknader frå lokalt næringsliv og landbruk. Dette gjer at fondet har gitt nesten 3 millionar kroner i kalenderåret 2025. Det er eit tydeleg signal om at Vaksdal kommune vil satse, i ei tid der presset på kommuneøkonomi er stort.

Vaksdal Næringsselskap ynskjer å rose administrasjonen og politikarane i bruken av dette fondet. Sjølve fondsmidlane kom i utgangspunktet frå konsesjonsavgift frå BKK, og tilførsla av kapital kjem i dag frå det same, pluss renter og anna avkastning av kapitalen. Når kommunen vel å prioritere næringsfondet, viser det ei god forståing av at eit godt næringsliv er ein føresetnad for framtidig busetjing, tenestetilbod og utvikling av våre lokalsamfunn.

Næringsfondet vert aktivt brukt av verksemdene i kommunen. Midlane som vart delte ut i november, går til investeringar, vidareutvikling og omstilling. Viktige verksemder som Leiren Laks og Arnpro er døme på bedrifter som satsar og vidareutviklar seg i Vaksdal, medan det òg er gledeleg å sjå at ikoniske Dale Vertshus fekk midlar til renovering og utvikling inn mot Fellesprosjektet Arna-Stanghelle. Slike verksemder bidreg ikkje berre med arbeidsplassar, men også med identitet og aktivitet i bygda.

Det er også viktig å peike på at næringsfondet ikkje berre er for desse typar av verksemder. Også primærnæringane, som landbruk, har moglegheit til å nytte denne ordninga. Tidlegare var det eit eige fond for landbruk, i 2022 vart alt slått saman til eitt fond. For mange gardbrukarar og småskalaprodusentar kan støtte til investeringar, tilleggsnæring eller utviklingsprosjekt vere avgjerande for vidare drift. At kommunen legg til rette for dette, er viktig for å ta vare på både arbeidsplassar, matproduksjon og eigenberedskap.

Effekten av næringsfondet handlar om å skape nye arbeidsplassar og å bevare dei som allereie finst. I ei tid med aukande kostnader og uvisse i mange bransjar, kan eit slikt verkemiddel vere avgjerande for om ei verksemd tør å satse vidare. At våre lokale verksemder tør å satsa vidare i kommunen vår, er noko me alle skal vere glade for. Det gjev tryggleik, lokale arbeidsplassar, og ikkje minst ei vidare tru på framtida i Vaksdal.

Det er heller ikkje sjølvsagt at alle kommunar har ei slik ordning. Mange kommunar manglar eit næringsfond, eller har svært avgrensa moglegheiter til å støtte lokalt næringsliv. Me kan berre sjå over fjorden på ein kommune som hadde bite av heile handa vår om dei fekk moglegheita til ei liknande satsing. At Vaksdal kommune både har eit aktivt næringsfond og politisk vilje til å bruke det, gjev oss eit klart fortrinn i konkurransen om arbeidsplassar og nyetableringar. Her ser me allereie døme på bedrifter dei to siste åra som har vald kommunen vår, delvis grunna slike ordningar.

Kva har då Vaksdal Næringsselskap med dette å gjera? Mange trur at det er næringsselskapet sjølv som gjev ut midlar, då det var ei liknande ordning før i tida. Men det er ikkje tilfelle no. Likevel kan me spela ei viktig rolle i dette arbeidet. Selskapet er ein støttespelar for næringslivet i kommunen, og fungerer som ein ressurs for verksemder som ønskjer å utvikle seg, investere eller søkje offentlege midlar. For mange kan terskelen for å kome i gang vere høg, og då er det verdifullt å ha nokon å sparre med – anten det gjeld idéutveksling eller direkte søknadsarbeid. Sjølv har eg fått god erfaring med å hjelpe fleire av verksemdene som har fått midlar, og det er veldig kjekt å sjå når arbeidet me gjer saman gjev resultat.

Når kommune, administrasjon og næringsliv spelar på lag, kan ein få til mykje saman. Næringsfondet i Vaksdal er ikkje berre ei fin ordning på papiret, men brukt rett, så er det eit aktivt verkemiddel som bidreg til verdiskaping, arbeidsplassar og framtidstru – i både næringsliv og primærnæringar.

For Vaksdal Næringsselskap AS,Jørgen Lie Kjøndal