Herold

Måndag kveld hadde politiet i Florø rigga seg for fartskontroll i Havreneset.

Det var bilistane si framferd i 40-sona som skulle sjekkast, og det gjekk bra for dei aller, aller fleste.

Men ikkje for alle.

– To bilistar hadde det for travelt, og den eine av dei blei målt til 54 kilometer i timen, fortel tenestestadsleiar for politiet i Florø, Synnøve Domben.

Bilisten var dermed eit stykke unna å bli fotgjengar. Her går grensa på 66 kilometer i timen i 40-sone.

I tillegg til førelegg, så blei det også delt ut litt prikkar i førarkortet til dei to sjåførane. Ifølgje regelverket vankar det to prikkar når du køyrer mellom 11 og 15 kilometer for fort på vegar som har fartsgrense 60 kilometer i timen eller lågare.

Og har du først fått prikkane, så må du slite med dei i tre år framover, før dei blir sletta frå førarkortet ditt. Og viss du klarar meisterstykket å pådra deg åtte av desse prikkane, så blir du utan førarkort i seks månader. Å få åtte prikkar kan høyrast vanskeleg ut, men ikkje om du er bilist med prøveperiode. Då blir det delt ut doble prikkar, og du kan risikere å nå grensa mykje raskare.

Vil du studere regelverket litt meir inngåande, kan du lese meir her.