«Asle var ein mann med ei framifrå evne til å gjera dei rundt seg gode»
Plus
Det var med sorg me mottok meldinga om at Asle Bergstrøm var gått bort. I gravferda og under minnestunda etterpå fekk ein dokumentert frå familie, vener, naboar og hyttenaboar kva fantastisk person Asle var, både som familiehøvding og som spydspiss i frivillig samfunnsnyttig arbeid på mange område.
Desse minneorda er frå oss skivener. Asle vaks opp med ski på beina på Myrdal. Han vart rapportert i Bavallen fyrste gong som 10-åring. Han vart ein god alpinist og saman med andre lokale skiløparar sette dei Voss på alpinkartet i Norge.
Men det var som idrettsleiar og arrangør han verkeleg sette spor etter seg. På 60-talet sette Asle og andre framsynte karar i gang arbeidet med å oppgradera Bavallen som alpinarena.
Det fyrste store prosjektet var ny storslalåmløype. Etter mange dugnadstimar vart bakken opna til senior-NM i 1965. Deretter fylgde Holmenkollen Kandahar i 1969. Gjennomføringa var så god at ein fekk World-cup-finalen i 1970 med både slalåm og storslalåm. Då var Asle assisterande rennleiar, noko som var ein god skule. Under WC i 1974, 1977 og 1981 var Asle rennleiar.
Han slutta sin karriere som rennleiar for internasjonale renn med junior-VM i 1995. Innimellom desse internasjonale renna var det fleire senior-NM, junior-NM, Coca Colafinalar og Donald Duckrenn. Alle med Asle som rennleiar. Samstundes var han Norges skiforbund (NSF) sin representant på små og store renn - både i inn- og utland - som dommar og teknisk deligert.
Asle var leiar i Voss idrettslag i mange år og er æresmedlem i laget. Han var leiar i Hordaland skikrets frå 1982 – 1985 og fekk kretsen sin hederspris i 2013. Han var medlem og leiar for det Internasjonale Skiforbund (FIS) si gruppe for bakkegodkjenning.
På nasjonalt nivå var han nestleiar i Alpinkomiteen og var visepresident i Skistyret på slutten av 1980- talet. Og då det var stor uro i NSF på slutten av 1990-talet sat Asle frå Voss - med tillit i alle leirar – som leiar av valnemda.
Asle runda av sin aktive karriere – då som pensjonist – som leiar av Voss idrottsråd. Asle brann for at barn og unge skulle få driva med leik og idrett. Evna hans til å skaffa anleggsmidlar – som det alltid er behov for – er legendarisk.
I tillegg til å vera ein god ven var Asle ein mann med ei framifrå evne til å gjera dei rundt seg gode. Det gløymer me aldri.
Med dette lyser me fred over Asle sitt gode minne og seier TAKK FOR LAGET.