Herold

I desember 2013 delte journalist og diktar Helge Arild Bolstad ein nyskriven salme med lesarane av spalta Hjørnespark, som han hadde i Vaksdalposten i mange år. I 2018 sette Erlend Styve melodi til salmen, og fekk han spelt inn saman med bandet sitt Twang Gang. Her deler me Bols sin tekst, og salmen kan ein høyra nedst i saka.

Det går ein veg til Betlehem i denne mørke tid. Ved veita står ein liten gut med veslesyster si.

Frå vegen høyres barnelått og song om glade jul. I veita slær dei blikket ned og kryp, som best, i skjul.

Maria ber ein ufødd son til byen Josef må. I veita sit to andre born som flykta der ifrå.

På markene ved Betlehem stig fram eit englekor. Det trøystar alle andre enn vår syster og vår bror.

Langs vegen kjem tre vise menn med myrra og med gull. I veita ser dei fattigdom, men kjenner inga skuld.

For stjernene på himmelen er losen for dei tre og arme små på jorda her får andre bala med.

Om vegen vert det snakka flott av biskop og av prest. Dei talar om det Herrens barn som kom til jord som gjest.

Ved vegen sit to gjestar små åleine i ei veit. Fordi dei er av Ismaels ætt er dette visst nok greit.

Frå veita stig ei stille bøn om hjelp i dette bel. Men ingen engel syner seg med song og harpespel.

Nei, ingen engel syner seg i veiter langs ein veg der nordmenn i ei ventetid har nok med berre seg.

Smartembed for https://www.youtube.com/watch?v=nZMDOFMjEnY&list=RDnZMDOFMjEnY&start_radio=1