Herold

Urnes stavkyrkje var den første norske innskrivinga på UNESCO si verdsarvliste i 1979. Det er ei stor julegåve til ikkje berre Ornes, Luster og Sogn – men til verda – at vi sist veke endeleg fekk løyvd midlar i fylkestinget til å ferdigstille verdsarvesenteret.

Det er på høg tid!

Urnes stavkyrkje er datert til kring 1130, og er ei av dei best bevarte stavkyrkjene i landet. Særleg treskjeringarbeidet og den omfattande innvendige dekoren gjer kyrkja heilt unik av dei stavkyrkjene vi har att. Eit fortidas smykke, som vi kan glede oss over i notida – og i framtida.

Dei som har arbeidd for prosjektet med eit nytt verdsarvsenter over mange år fortener stor ros for pågangsmot og engasjement. Sjølv har eg vore tett på prosjektet dei siste to åra i mi rolle som hovudutvalsleiar for kultur i Vestland fylkeskommune. Eg kjenner på ei stor takksemd for at vi har klart å skape eit solid politisk fleirtal i fylkestinget for å løyve dei resterande 16 millionane som mangla for å ferdigstille dette viktige prosjektet, i tillegg til det som tidlegare er løyvd.

I mai i år, i 26 grader og strålande solskin, tok eg med meg hovudutval for kultur, idrett og inkludering i Vestland fylkeskommune til Ornes, for å besøke kyrkja og med sjølvsyn sjå staden der verdsarvsenteret no kjem. For meg var det eit spektakulært gjensyn, for andre eit storslått første møte. Landskapet og kyrkja viste seg frå si aller beste side.

Med finansieringa frå fylkeskommunen på plass sikrar vi at alle som kjem til Urnes, uavhengig av vêr, kan få like storslåtte møte med vår ypparste kulturarv. Verdsarvsenteret betyr meir kunnskap og betre tilgjenge, utan å gå på akkord med verneverdiane.

Det er ikkje gitt at dette vedtaket kom til, men for Venstre og samarbeidspartia i fylkestinget har det vore viktig å både ha kulturpolitiske ambisjonar og vise handlekraft – i heile fylket vårt. Det er det som gjer Vestland til Noregs leiande kulturfylke.