Herold

I det siste kommunestyremøtet i 2025 blei nye representantar for ungdomsrådet 2026 valt. Det har komme til eit par nye, og nokre har tatt attval.

Ungdomsrådet i Vaksdal er sett saman av fem representantar frå dei ulike bygdene; Eksingedalen, Stamnes, Dale, Stanghelle og Vaksdal, og dessutan to representantar frå ungdomstrinnet sitt elevråd ved Dale skule.

Geir Odin gler seg

For 2026 blei det valt nye representantar frå bygdene Stanghelle, Stamnes og Eksingedalen, i tillegg til to representantar frå elevrådet ved skulen. Her har ungdommar frå Stanghelle, Stamnes og Eksingedalen i alderen 13-19 år fått invitasjon til å melda seg til å stille til val i ungdomsrådet.

Geir Odin Dale frå Stamnes er valt inn i to år for Stamnes. Han er ein av dei nye og har aldri vore med på dette før.

- Eg gler meg. Det blir noko nytt og spennande og heilt sikkert kjekt, seier han.

Ny periode for Johanne og Vilde

Johanne Hesjedal (Stanghelle) og Vilde Birkeland Johnsen (elevrådet), har vore med før og har blitt valt til å ta ein ny periode.

- Det er kjekt å vera med i ungdomsrådet, så difor ville me halda fram, seier dei to.

Ungdomsrådet si oppgåve er å handsama saker som er relevante for ungdom, og rådet kan gje direkte råd til kommunestyret.

Dette er dei som blei valt inn i ungdomsrådet for 2026:

Johanne Hesjedal – Stanghelle (2 år)

Geir Odin Dale – Stamnes (2 år)

Heidi Nesheim – Eksingedalen (2 år)

Matheo Osman Tollefsen – elevrådet Dale skule (1 år)

Vilde Birkeland Johnsen – elevrådet Dale skule (1 år)

Vararepresentantar:

Ronja Andreassen Rabben – Stanghelle (2 år)

Markus Vik-Lilletvedt – Stamnes (2 år)

Elias Bergo – Eksingedalen (2 år)

Desse har eit år att etter førre val

Markus Andre Andersen Vinsrygg – Vaksdal

Frida Kirsten Fardal-Jakobsen – Dale

Vararepresentantar:

Victoria Irena Laskowska Andersen – Dale (2 år)

Leon Sebastian Knutsen-Larsen – Vaksdal (2 år)

Representantane frå bygdene Stanghelle, Stamnes og Eksingedalen vert valde for to år, medan representantane frå elevrådet vert valde for 1 år.