Herold

Skrotet hopar seg opp like over Kvassnesstemma.

Om ein vandrar på gangvegen ovanfor Kvassnestemma i retning Røsvikdalen, kjem ein til ei bru over eit lite dalføre. Her har det i årevis blitt slengt ulikt skrot, og staden kan sende tankane til ein slags Kjevikdalen i miniatyr.

Desember 2025 er ikkje noko unntak. No ligg det sju handlevogner, ein stolpe frå stolpejakten, ein sparkesykkel, ein benk, ei TV-antenne, tomgods og anna søppel på staden.

Leiar for Miljø og byggesak i Alver kommune, Eirik Sætre, visste ikkje om dumpinga før Nordhordland viste han bilda. Men fenomenet kjenner han godt til.

– Dessverre skjer dette oftare enn ein skulle håpe. Og så ser vi forskjell på bevisste handlingar eller når det er ungdomar som har det litt moro ein fredagskveld, seier han.

– Men det eine fører til det andre. Har nokon først kasta noko, er det gjerne fleire som gjer det.

Må vurderast

Sætre kan ikkje på ståande fot seie kva som vil skje med handlevognkyrkjegarden i Knarvik.

– Det blir ei prioritering på kva ein skal bruke tid og kroner på. Ein vurderer forureningspotensial opp mot andre oppgåver.

Han fortel vidare at dei ønsker å finne ut kven det er som har gjort dumpinga, og deretter pålegge dei å rydde opp. Samstundes erkjenner han at det kan bli utfordrande.

– Det er dessverre vanskeleg å finne ut av.

Dermed står ein igjen med eit par alternativ:

– Dersom vi vurderer å fjerne det, blir det med våre eigne folk og då er det skattebetalarane som betalar, seier han og legg til:

– I nokre tilfelle er det ikkje pengar eller kapasitet og då er det naturen som blir lidande.

Ei anna løysing er at grunneigarar eller naboar ordnar opp.

– Heldigvis er det mange som tek ansvar for å rydde i ting andre har kasta. Folk som bruker av eigen tid og ressursar på dette. Det står det stor respekt av.