Herold

Helse Førde stadfestar at den umiddelbare innsparinga ved å leggje ned hudpoliklinikken i Florø er beskjeden, i tråd med argumenta til ordførar Bengt Solheim-Olsen. Samstundes understrekar dei ein vanskeleg økonomisk situasjon og peikar på betydelege langsiktige innsparingar knytt til reinvestering i utstyr.

For nokre dagar sidan blei det kjend at administrerande direktør Arve Varden i Helse Førde tilrår styret å flytte hudpoliklinikken i Florø til Førde. Forslaget imponerte ikkje Kinn-ordførar Bengt Solheim-Olsen. Han meiner innsparinga er liten, medan dei samfunnsøkonomiske kostnadane blir for store.

Han slår fast at han anerkjenner Helse Førde sine økonomiske utfordringar, men vil jobbe opp mot helseforetaket sitt styre for å prøve å hindre at hudpoliklinikken i Florø blir lagt ned og flytta.

– Poenget er at innsparinga ved å leggje ned i Florø er så liten. Folk som les saka i Firdaposten trur kanskje at det er ein heil avdeling på SMS som er forslått lagt ned, men det er snakk om eit halvt årsverk, sa Solheim-Olsen tidlegare.

Han peikar på at hudpoliklinikken i Florø i dag har pasientar som får lysbehandling fleire gonger i veka, der sjølve behandlinga tek få minutt. Viss tilbodet flyttast til Førde, må desse pasientane, mange i arbeidsfør alder, rekne med fleire timar i reiseveg, auka reisekostnadar og meir fråvær frå jobb.

– I mitt hovud går ikkje det samfunnsøkonomiske reknestykket opp, avslutta Solheim-Olsen.

Helse Førde stadfestar: Beskjeden innsparing på kort sikt

Direktør for medisinsk klinikk, Trine Vingsnes, stadfestar at den umiddelbare innsparinga er knytt til eit halvt årsverk.

– Det stemmer at personalkostnaden i Florø i dag tilsvarar 0,5 årsverk, og at den umiddelbare innsparinga vil vere heile eller deler av denne, seier Vingsnes til Firdaposten.

Ho legg til at dette er ei beskjeden innsparing på kort sikt, men understrekar at forslaget viser alvoret i Helse Førde sin økonomiske situasjon.

– At administrerande direktør foreslår dette, seier nok ein del om den økonomiske situasjonen i Helse Førde, seier Vingsnes.

Kan spare millionar på utstyr

På litt lengre sikt kan ein derimot spare ein del pengar på å samle tilbodet i Førde, seier både Vingsnes og utgreiingsrapporten.

– Etter kvart vil spart reinvestering i nytt lyskabinett utgjere ein ytterlegare innsparing, men det er på lengre sikt, seier Vingsnes.

Rapporten viser at dagens lyskabinett i Florø (og Sogndal) har avgrensa levetid, og at det vil måtte skiftast ut innan fem til sju år. Kostnaden for eitt nytt lyskabinett er estimert til om lag 550 000 kroner ekskludert meirverdiavgift. Ved å samle tilbodet unngår ein denne investeringa.

50 pasientar får lysbehandling

Når Solheim-Olsen viser til samfunnsøkonomiske kostnadar handlar det om at pasientar som no kan få lysbehandling i Florø får lengre reiseveg og kanskje må ta fri frå jobben. I dag kan dei rekke behandlinga med ei litt utvida lunsjpause.

I 2024 fekk 50 pasientar lysbehandling i Florø, fortel Vingsnes. Talet varierer noko frå år til år; i 2023 var det 66 pasientar.

Lysbehandling er ei seriebehandling der pasientar med hudlidingar som psoriasis og eksem får lys 2-3 gonger i veka over 8-10 veker, ofte i ein serie på rundt 25 behandlingar. Sjølve lysbehandlinga tek få minutt, men kan inkludere smøring eller behandlingsbad i forkant. Det er tilrådd maks éin serie per år, men det kan gå fleire år mellom kvar serie.

Vil skape ulemper for pasientane

Helse Førde legg ikkje skjul på at flyttinga vil gjere livet vanskelegare for pasientane.

– Talet på pasientar er imidlertid òg lågt, og ingen mister tilbodet om lysbehandling sidan det vil vere tilgjengeleg på sjukehuset i Førde. Ulempa er lengre reiseveg og at nokre pasientar då ikkje vil kunne, eller ikkje vil ønske, å nytte dette tilbodet, seier Vingsnes.

Utgreiingsrapporten har sett nøye på både dei samfunnsmessige konsekvensane og pasientperspektivet.

• Lengre reiseveg: Pasientar frå Florø-området, øyane utanfor, og Bremanger, vil få ein meir krevjande transport. For lysbehandling, som krev hyppige besøk, blir ulempa med auka reisetid vesentleg større.
• Påverknad på arbeid og utdanning: Pasientar som treng seriebehandling, må bruke meir tid på behandling, noko som reduserer moglegheita til å delta i arbeidsliv og utdanning. Dette gjeld spesielt studentar utan bil.
• Sårbare grupper: Barn, eldre og skrøpelege pasientar, samt dei som treng følgje, vil ha auka risiko for manglande gjennomføring av behandlinga på grunn av auka reisetid.
• Ikkje alle vil nytte tilbodet: Rapporten forventar ein nedgang i aktiviteten for lysbehandling dersom tilbodet flyttast, då enkelte pasientar ikkje vil kunne eller ønske å nytte det grunna lang reiseveg.

Vil vurdere kompenserande tiltak

Helse Førde vurderer kompenserande tiltak for å møte utfordringane med lengre reiseveg, som tilpassing av timar eller utvida opningstid, inkludert kveldspoliklinikk. Alternativ som tablettbehandling eller biologiske legemiddel er òg tilgjengelege, men for enkelte pasientar kan dette innebere eit dårlegare tilbod enn dagens løysing, ifølgje rapporten.

Den endelege avgjerda om hudpoliklinikken i Florø, og dei andre omorganiseringssakene, blir tatt av styret i Helse Førde tidlegast 29. januar 2026.

Vil kjempe for hudpoliklinikken: – I mitt hovud går ikkje det samfunnsøkonomiske reknestykket opp

Vil legge ned hudpoliklinikken i Florø og flytte han til Førde