Herold

I avisa ser vi at Helgeland museum og Hattfjelldal kommune har utfordringar med sitt samarbeid. Kommunen vil seie opp avtalen med museet, og museumsdirektøren seier at det er avtalefesta at det først skal vera drøftingar før eventuell oppseiing. Ho seier og at dei har lyst ut stillinga i Hattfjelldal, og at dei arbeider med plan om ombygging av lokalet.

Eg har ingen kjennskap til denne avtalen det er snakk om, og har ikkje kunnskap om målsettinga for moderne museum, men har likevel meiningar om dette. Eg snakkar med andre folk om dette, og eg føler at mange andre har dei same synspunkta.

Forutsett at det er rett av avtalen inneheld punkt om drøftingar før oppseiing, synes det merkeleg at direktøren først får lese i avisa at kommunen vil seie opp. Det er jo å håpe på at det er dialog mellom kommunen og museet, og at problema er prøvd løyst før ein går til oppseiing. Dersom ein eller begge partane er misnøgd med avtalen må det kanskje gå an å reforhandle den?

Fjellfolkets hus er fine lokaler for museet, og eg har absolutt ikkje tru på at det vil bli framgang for drifta av museet ved å investere i ombygging.

*Som i andre *foretak er ofte dei menneskelege ressursane avgjerande for drifta. Når no Kjell Vidar Norheim har sagt opp stillinga si så er det etter eit år med mange flotte kveldar med foredrag om varierte tema. Kjell Vidar er ein god formidlar, og han er flink til å trekke med andre ressursar til slike arrangemet. Fleire gonger har det vore skikkeleg stort oppmøte. Til og med besøk frå andre kommunar. Eg har og fått med meg at skuleklassar har hatt egne «museumstimar» i Fjellfolkets hus.

*I den første tida *var det Fjellfolkets hus sin «far» Ansgar Kleven, som styrte drifta. Både han og Kjell Vidar er utdanna pedagogar, flinke til å formidle, og ikkje minst har dei god kjennskap til geografien, folket og naturen. Begge er svært interessert i historie og har tilknytta seg hjelp av folk frå bygda.

Eg håpar at Helgeland museum og Hattfjelldal kommune reforhandlar sin avtale, med målsetting om at vi skal ha levande museumsdrift i bygda. Og at når det skal tilsettast folk, så må det leggast mykje vekt at dei har kunnskap om naturen, kulturen og folket her. Folk med høg utdanning som kjem utanfrå må bruke lang tid på å lære seg dette, og det har hittil vist seg ofte at dei vil forlate oss etter kort tid.

Sjølsagt må det vera utstillingar på Fjellfolkets hus, men etter mi meining bør det leggast meir vekt på formidling.