Vil styret i Helse Midt-Norge svare, der administrerande direktør og styreleiar tiar?

Medan snøballen ruller utfor stupet forsvarer HMN forfordelinga

Les også:

Det store trønder­ranet

Konsekvensane av skeivfordelinga

Systemfeil – ikkje tilfeldigheiter

Vil styret i Helse Midt-Norge svare, der administrerande direktør og styreleiar tiar?

Kenneth Langvatn, styreleiar og Sverre Øvrelid Steen, dagleg leiar

Sunnmøre regionråd

Du leser nå et leserinnlegg. Det uttrykker innsenderens mening.

Helse Midt-Norge er eit instrument for å oppnå nasjonale helsepolitiske mål, og skal fordele tilskot og organisere tenesteytinga slik at ein når desse måla i heile regionen. Dette er kjernen i samfunnsoppdraget.

Vi opplever at styreleiaren og administrerande direktør i Helse Midt-Norge først og fremst svarer på spørsmål vi ikkje har stilt – medan dei viktigaste punkta i kritikken står heilt utan svar.

LENKE: Kva skjer når matematikk blir politikk – og helseressursane blir skeivfordelt?

Når styret i Helse Midt-Norge møtast neste gong, så set vi vår lit til at dei drøfter kjernen i det vi spør om: Kva er konsekvensane av at St. Olavs hospital har bygd opp 4,2 milliardar kroner i overskot sidan 2011, medan Helse Møre og Romsdal har hatt likviditetsproblem i 12 av dei siste 14 åra?

Vi ser med stort alvor på kva som står på spel: korleis skeivfordelinga i Helse Midt-Norge gir varige og store økonomiske forskjellar som igjen påverkar beredskap, kvalitet og tilgjenge til helsetenester for innbyggarane i Møre og Romsdal.

Denne skeivfordelinga gjer at St. Olavs hospital i førre femårsperiode kunne auke talet på årsverk med 11,4 % - 944 personar – og samstundes samle opp eit overskot på meir enn 1,66 milliardar* *kroner.

I sitt svar gir styreleiar og adm. direktør Sunnmøre regionråd rett i at dersom Helse Midt-Norge hadde lagt til grunn den nasjonale modellen ville dette isolert sett gitt Helse Møre og Romsdal ein større del av dei statlege midlane og ein auke i ramma. Dei har operert med ulike tal tidlegare, men la oss for argumentets skuld ta det siste for gitt: Dette dreier seg kun om 1,4 prosent og 57 millionar kroner per år.

*I fordelingsmodellar fungerer små avvik som ein snøball i ein bakke: dei verkar kanskje små når du byrjar, men ruller du den år etter år, veks den til noko langt større når den nærmar seg stupet ved enden av bakken. *

Nettopp slik har eit tilsynelatande lite prosenttal bidratt til store utslag over tid – fleire milliardar i opparbeidd eigenkapital i Trondheim og vedvarande likviditetsproblem i Møre og Romsdal.

Mekanismen som skaper dei systematiske utslaga heiter kvadrering av brutto driftsutgifter. Når dei historisk høge kostnadene ved St. Olavs blir opphøgde i andre potens, blir den høge kostnadsbasen forstørra – og dermed også delen St. Olavs hospital får av kaka. Akkumulert vert millionbeløp til milliardbeløp over tid. Denne effekten har styreleiar og adm. direktør i Helse Midt-Norge heilt unnlate å kommentere i sitt tilsvar.

I staden viser styreleiar og adm. direktør til tidlegare underskot ved St. Olav, som om dette eliminerer spørsmålet om dagens systematiske utslag. Dette underbygger også vår frykt for at Helse Midt-Norge har ein særskild omsorg for storebror i regionen. No er det derimot ulvungen i flokken som treng hjelp.

Då reagerer vi sterkt over at ytringane frå styreleiar og adm. direktør kan lesast som eit angrep på eit helseføretak dei sjølve har ansvar for. Realiteten er at dei veletablerte sjukehusa i Helse Møre og Romsdal er, og har vore, dei klart mest effektivt drivne sjukehusa i helseregionen. I den grad ein skal samanlikne helseføretak vil vi sterkt rå Helse Midt-Norge til å samanlikne våre helseføretak med dei nordafor, som har liknande demografiske og geografiske utfordringar som fylket vårt.

Høg produktivitet kombinert med negativ likviditet er eit signal om underfinansiering, ikkje ineffektiv drift.

57 millionar over 14 år blir 800 millionar kroner – utan renter. Og då har vi ikkje eingong gått inn i kor gale det var før modellen blei revidert i 2021.

Sunnmøre regionråd, helseføretaket vårt og innbyggarane i Møre og Romsdal treng rettferdige beslutninger av styret - ikkje avsporingar.

Vil du skrive i På tråden? Send e-post til ordetfritt@r-b.no

Vil du skrive leserinnlegg? Send e-post til ordetfritt@r-b.no

Her finner du meningsstoffet i Nordvest debatt – Rbnetts meningsportal