Herold

Ei mesta fullsett Hov kyrkje tok i mot Frei Barnekor, som på si side presenterte ein konsert som var fylt av songglede og evnen til å gi publikum ekte underhaldning. Og kanskje mest imponerte solisten med røter til Sunndal.

- Skal ta barna på alvor

Velfortent applaus til stjernetenoren

Anna Ulvund-Klokseth fekk synge solo på "Å kom nå med lovsang" saman med Nils Arne Halle Erstad, og ho imponerte publikum i den siste songen i det offisielle programmet. Ikkje berre Anna, men ei lang rekke av dyktige solistar fekk tre fram på kyrkjegolvet denne søndagskvelden.

Laurdag heldt dei konsert for ei fullsett Frei kyrkje, noko som er fast tradisjon for barnekoret. Men det er første gang Frei Barnekor tar turen til Hov kyrkje, men vonleg ikkje siste gangen. Det er eit kor med mykje aktivitet, og denne hausten har kanskje vore ekstra travel, for første søndag i advent deltok dei i den tv-sendte gudstenesta frå Kirkelandet kyrkje.

Totalt har heile koret 38 barn med i alderen frå fem år og oppover, delt opp i to grupper; ei aspirantgruppe for barn frå fem til sju år og ei gruppe for dei frå 3. klasse og oppover. Ikkje alle var med til Hov kyrkje, men ei fin rekke av aspirantar fylte opp framføre dei eldste i koret. På den eine sida av koret satt ei rekke av strykarar på fiolin og cello som var henta inn frå NTNU og på den andre sida satt musikarane som sørga for at alle heldt takta - flygel, to sett trommer, bass og ein klarinett. Med andre ord: Med ein god miks av profesjonelle musikarar og amatørmusikarar var ingen ting overlate til tilfeldigheitene.

Og nettopp det er pianist i koret, Rune Tylden, opptatt av.

• Det er viktig å ta barna på alvor og å tenke kvalitet i det tilbodet ein gir dei. Ei slik satsing kostar litt, understrekar han til publikum.

Til Aura Avis fortel han at det med julekonsert var noko som blei starta opp relativt kort tid etter at koret starta for snart ti år sidan under leiing av han og Cathrine B. Haukenes som dirigent. Dei har vore med heile vegen.

• Det begynte i det små, men dei siste fem-seks åra har vi alltid hatt ein stor julekonsert i Frei kyrkje, og kvart tredje år drar vi ein annan plass og syng ein konsert nummer to. Den første gangen var vi i Stangvik og denne gangen er vi her. I løpet av året har vi to store konsertar, ein om sommaren og ein til jul. Vi har også spelt inn eit par musikkvideoar, den eine songen framførte vi her i konserten, fortel Tylden, som og har jobben med å lage arrangement til det dei framfører.

Frå Sunndals lokale musikkliv deltok både Hov barnegospel og Nora Hjelseth og Leah Isabelle Lervik. Dei to sistnemnte song duett på songen "Jeg skal finne deg" av gruppa ULD, som har blitt ganske kjent i løpet av dette året.

Hov barnegospel deltok på eit par av songane, og pianisten i barnegospelkoret, Ingebjørg Charlotte Paulshus Storset, er glad for at koret fekk vere med. Dei er for tida 14 barn i fire-fem-årsalderen, men med plass til fleire.

Som nemnt var Nils Arne Halle Erstad, Nordmøres eigen stjernetenor, med som solist, både saman med koret og åleine. Soloen han hadde med koret på songen "Stjernesludd" var verkeleg framifrå, og han gjekk alle andre som har tatt den inn på sitt repertoar, som eksempel Kurt Nilsen, ein høg gang. Etter å ha framført "O helga natt" åleine fekk han ståande applaus frå fleire blant publikum.

Etter konserten fortel Erstad at det er ei travel tid til han. Han skal rett frå Sunndalsøra til Kristiansund for å sove, for han er innbooka på pysjflyet til Oslo og vidare til Kristiansand neste dag.

• Eg har pendla så mykje mellom Kristiansund og Kristiansand i haust at det går nesten litt i ball. Det er mogleg å booke fly frå Kristiansund til Kristiansund, tru det eller ei, så eg må passe godt på slik at flybestillingane blir riktige.

Allereie torsdag kveld er han tilbake i Hov kyrkje når han blir å høyre saman med Dalen Mannskor i deira julekonsert. Kanskje blir det mogleg endå ein gang å høyre han synge "O helga natt" der.