Herold

Eit innbyggjarinitiativ ber Kinn kommunestyre innføre ei såkalla Florølandetgrense, etter modell av markagrensa i Oslo. Målet er å styre ny næringsutvikling til allereie planerte område, og skjerme nærnaturen rundt Florø.

Viser til naturavtale og dårleg statistikk

Kommunedirektøren: Bør knytast til planarbeidet

Kan bli politisk stridstema

Florø Bulystforeining overrekte innbyggjarinitiativet til ordførar Bengt Solheim-Olsen i oktober. Initiativet har støtte frå 415 registrerte innbyggarar i Kinn kommune, langt over kravet på 300 underskrifter for at saka skal behandlast politisk. Tysdag kjem saka opp i kommunestyret.

Forslaget går ut på å innføre ei fast grense – kalla Florølandetgrensa – som skal fungere som eit planprinsipp i kommuneplanperioden fram til 2036. All ny næringsutbygging i Florøområdet skal skje innanfor denne grensa, medan øyane og grøne nærnaturområde rundt byen skal liggje urørte i planperioden.

– Det finst om lag 250 mål ferdig opparbeidd, ubrukt næringsareal i og rundt Florø. Vi meiner det er både unødvendig og uansvarleg å byggje ned meir natur før desse områda er tekne i bruk, skriv Florø Bulystforeining i initiativet.

I dokumentasjonen viser initiativtakarane til både Naturmangfaldlova, FN sin naturavtale og regjeringa si naturmelding. Dei peikar også på at Kinn kommune kjem dårleg ut i Sabima si kartlegging av naturnedbygging, der kommunen ligg heilt nede på 327. plass av 357 kommunar i landet.

– Dette er eit omdømeproblem for kommunen. Kven ønskjer å flytte til ein by som er kjend for å rasere natur, spør initiativtakarane.

Florø Bulystforeining ber om at innbyggjarinitiativet blir behandla som eiga sak i kommunestyret, og at dei får høve til å informere politikarane direkte frå talarstolen.

– Forslaget vil ha store konsekvensar for framtidig utvikling av Florelandet, skriv kommunedirektøren i sitt saksframlegg.

Han gir eit tydeleg råd til politikarane om at dei ikkje gjer vedtak i saka som blir direkte styrande for pågåande planarbeid etter plan- og bygningslova.

– I desse planarbeida er det gjennomført ei langt meir omfattande vurdering av konsekvensar for arealbruk enn det som kjem fram av innbyggjarinitiativet, skriv han.

Kommunedirektøren meiner initiativet har eit viktig innhald og ikkje bør avvisast, men at det bør vurderast som eit innspel i sluttføringa av kommuneplanen sin arealdel og reguleringsplanen for Måsholmen/Håskjæra – ikkje vedtakast som eit styrande prinsipp.

Han peikar også på at ei «markagrense» ikkje har sjølvstendig lovheimel, og at reell verknad berre kan oppnåast gjennom vedtak etter plan- og bygningslova.

Saka kjem til behandling i kommunestyret samstundes som kommuneplanen sin arealdel er ute på høyring. Florø Bulystforeining har bedt om ei todelt politisk handsaming, der initiativet først blir drøfta før jul, og deretter realitetshandsama tidleg i 2026, etter at høyringsrunden er avslutta.

I tillegg til forslaget om Florølandetgrense har Florø Bulystforeining også tilbydd seg å lage eit eige naturpolitisk dokument for Kinn kommune. Foreininga peikar på at kommunen allereie har eit næringspolitisk dokument, men manglar noko tilsvarande for natur.

Dette tilbodet er ikkje omtalt i saksframlegget frå administrasjonen.