Herold

105 millionar for parkeringsplass i sentrum – ca. 750 millionar for Kulturhus, Rådhus og kyrkje med parkering. Skal me verkeleg ta oss råd til dette?

I kommunestyret på måndag 15.12 kjem sak om parkering for det nye kulturhuset, rådhuset og kyrkje opp. Tittelen på saka er «Avtale om kjøp av parkeringsplassar til Plogen kulturhus, rådhus og kyrkje».

Her skal politikarane seie ja eller nei til avtalen som administrasjonen har framforhandla med Coop Klepp. Utgangspunktet for forhandlingane blei diskutert i formannskapet i februar 2024, i ei sak med tittel: «Prinsipp for forhandlingar om intensjonsavtale for parkering i sentrum».

Kommunen vil betale Coop over 100 millionar for parkeringsplassar

Innhaldet i saka er lukka for offentlegheita, og diskusjonen av innhaldet i den er derfor avgrensa til medlemmer av formannskapet. Der sitt 3 frå Frp, 2 frå Høgre, 1 frå henholdsvis Ap, KrF, Sp og INP, totalt 9 stk. SV og Venstre er ikkje representerte. Det er berre medlemmer og varaer til formannskapet som har hatt innsyn i denne behandlinga, og berre 9 av 31 kommunestyrerepresentantar som var med å diskutere dette.

Innstillinga i saka på måndag er at kommunen skal bruke 105 millionar for 150 parkeringsplassar, under den nye storutbygginga til Coop i Klepp sentrum.

105 millionar må diskuterast og forankrast demokratisk – ikkje berre stemplast gjennom

Å bruke 105 millionar kroner på parkering er ei eventuell prioritering som må forankrast godt demokratisk. Kommunestyret har ikkje hatt moglegheita til å diskutere dette. Måndagens sak er i utgangspunktet eit ja eller nei, med eit stort opplevd tidspress på å banke dette igjennom og seie «ja».

Coop Klepp ønsker nemleg å starte utbygginga, og truar med at det ikkje blir noko avtale om me ikkje seier ja med ein gong, fordi ein ønsker å starte bygging neste år. Dermed er den opplevde valmoglegheitene veldig avgrensa.

Dei fleste representantane vil nok vere veldig motvillige til å stemme mot innstillinga, nettopp på grunn av dette opplevde tidspresset. Om dette er reelt eller ikkje, er vanskeleg å seie, men eg trur det er fornuftig å ha litt is i magen. På grunn av dette opplevde tidspresset står dette i fare for å bli ein skinnprosess med eit kommunestyre som i praksis berre sitt klare med «Ja»-stempelet sitt.

Lang sakshistorikk – administrasjonen har ikkje følgt opp politisk vedtak

Prosjektet med rådhus, kyrkje og kulturhus og tilhøyrande parkering har lang sakshistorikk. I november 2020 valde ein å gå vidare med å bygge rådhus, kyrkje og kulturhus og parkering i to forskjellige prosjekt. Grunnlaget var at parkering under bakken ville bli dyrt, og om ein skulle sjå prosjektet under eit, så ville det kunne bli vanskeleg å gjennomføre. Som kommunedirektøren skreiv:

«Kommunedirektøren ser at konsulenten si kalkyle ligg i overkant av det kommunen sjølv har vurdert i tidlegare saker, og dette vert dyre plasser. Desse investeringane vert tunge så tidleg i prosjektet, og kan utsetja realiseringa av prosjektet »

Plassane som ligg til grunn nå, er tilsvarande prisa som dei var i saka då. Kommunen syns altså det var dyrt i 2020, men i 2025 så nemner ein ingenting i saka om at dette er dyrt.

I september 2021 bad kommunestyre om å få moglegheita til å sjå på alternativ, med tilhøyrande kostnadsoverslag. Eit av alternativa var å utvide den allereie eksisterande parkeringsplassen ved Sirkelen/Kleppetunet med eit parkeringshus. Me i Venstre har spurt administrasjonen kor dette vedtaket har blitt behandla. Svaret på det er at vedtaket ikkje har blitt følgt opp demokratisk, og kommunestyret har ikkje hatt moglegheit til å vurdere forskjellige alternativ. Ein har berre gjort vurderingar internt i administrasjonen om at eit parkeringshus ved Sirkelen og Kleppetunet ikkje er eit godt alternativ.

Dette manglar demokratisk forankring.

Om ein treng 150 parkeringsplassar eller ei, om plasseringa er den rette, om 105 millionar er rett å bruke på det, er alle politiske spørsmål som fortener ein skikkeleg debatt. Me i Venstre håper me får nettopp det.