Herold

Leif Harald (35) bytta ut livet i Nordsjøen med bruktbilsal. Nå lar han òg seg overraske over den bratte vekstkurva til firmaet.

Ville slutte

Starta i det små

Såg potensial

Satsar stort

– Stor risiko

Sluttar

Jobbar lange dagar

* Oppsummering 'Kort oppsummert' *

NÆRINGSLIV: På tre år har bilbutikken N-Auto på Bygens nådd ei omsetning på 100 millionar kroner.

*– Me har nok passert 800 selde bilar i år, seier eigar Leif Harald Naley (35). *

Butikken såg si spede begynning i 2022, då Naley merka at helsa svikta.

Den gongen jobba han fullt som mekanikar for Equinor i Nordsjøen.

*– Eg slit med dårlege kne og har fått leddgikt. Då er det ikkje så bra å krype rundt og skru, medgir han. *

Equinor tilbydde omskulering, men Naley takka nei.

– Det er ein risiko å slutte i ei så god bedrift der «alle» vil inn, men når helsa seier stopp og ein har bestemt seg, så er det gjort, forklarer han.

Skudenesbuen bar nemleg på andre draumar.

*– Eg var sugen på å få til noko sjølv, styre dagane og skape arbeidsplassar. Dessutan brenn eg for bil, seier han. *

Medan Naley framleis jobba to veker på og fire av i Nordsjøen starta han N-Auto i det små, då på tomta der koronasenteret til kommunen låg.

Heldigvis fekk han med seg ein kompis med på laget.

*– Då var målet å selje to bilar i veka. I 2022 enda omsetninga på 25 millionar kroner, fortel eigaren. *

Og ganske kjapt kunne Naley gå ned til 50 prosent stilling i Nordsjøen.

Likevel var den ferske butikkeigaren langt frå fornøgd.

– Målet er å bli den største bruktbilbutikken på Haugalandet. Me ønsker å ha inne minst 200 leveringsklare bilar til ei kvar tid, seier han.

Dessutan såg han potensial for vidare vekst.

*– Me hadde stor etterspurnad og selde mykje bilar. Enten måtte me halde fram i det små, eller så måtte me ta steget vidare. *

Då var det berre éin ting å gjere: flytte.

Naley fann eit eigna lokale i den austlege enden av Stol-bygget. Her kjøpte han òg parkeringsplassen og to tomter sør for bygget.

– Kor stor var investeringa?

Eigaren har ikkje eksakt tal, men anslår mellom ti og fjorten millionar kroner.

– Eg har aldri investert så mykje før. Det er skummelt når ein både har familie, små ungar og nytt hus.

I mars 2024 flytta butikken inn i det nye lokalet.

Same år passerte dei ei omsetning på 100 millionar kroner.

I dag har butikken eigen verkstad og sju tilsette.

*– Dei siste månadane har me selt mellom 60 og 80 bilar i månaden. Det er nesten tre bilar om dagen i snitt. I år ligg me an til ei omsetning på mellom 100 og 115 millionar, seier han nøgd. *

– Men er det lønnsamt?

*– Ja, enn så lenge ser det ut til å vere det. Men det er ein stor risiko å tilsette og å ha mange bilar på lager. Det kostar pengar både i forsikring og vedlikehald, medgir han. *

Ved nyttår når Naley ein ny milepæl.

Då sluttar han heilt i Equinor.

– Du er ikkje redd for at dokker veks for fort?

*– Mange meiner me har det travelt, men me kan ikkje ha fleire folk på grunn av plassmangel. På sikt, om me skal ha inne 200 bilar, må me ha ein seljar til, svarer han. *

Firmaet har likevel nokre veksesmertar.

Eigaren vedgår at det kan bli lange dagar, eller i alle fall meiner kona det.

– Eg køyrer ungane på skulen og er på jobb i halv nitida, og så køyrer eg heim i 16.30-tida. Men det blir ofte kveldsjobbing, seier han, og:

*– Det har gått mykje tid til oppussing og bygging av ny verkstad, ved sidan av bilsalet. *

Nå jobbar gravemaskinar lengst sør på tomta.

Her skal det leggast asfalt, slik at butikken får meir plass til biloppstilling.

– Kva tenker du plasseringa på Bygnes har å seie for suksessen?

*– Eg trur den berre blir betre og betre. Det blir bygd ut på alle endar her, så eg er kjempefornøgd. *