Herold

Det er med undring eg har lese innlegga til Jørund Nygård i Motvind Ytre Fjordane vedkomande vindkraftproduksjon i Bremanger. Eg har lese innlegga fleire gonger, også kommentarane.

At ein er ueinig om saker er vanleg. Gjennom dette kan saker bli opplyst frå ulike sider. Det er slik demokratiet vårt fungerer, at ein argumenterer for saker ein er opptatt av er sjølvsagt. Det som undrar meg, er påstanden som Jørund Nygård set fram mot dei fleste av ordførarkandidatane våre. Einaste INP og SV går klar. For INP er det tredje gongen denne partileiaren skifter parti.

*Saker stiller seg nok litt annleis, *etterkvart som ein får innsikt og ansvar over kommunen sin økonomi, og kva som trengst. Eg har og følgd med på valkampen som Jørund Nygård viser til i sine innlegg. Når det gjeld Senterpartiet og Magne Kjerpeseth så kan eg fastslå at framstillinga som Jørund Nygård gir, ikkje er rett. Senterpartiet var og er fortsatt for vindkraftutbygging. Det var og Senterpartiet sitt syn når det gjaldt vindkraft på Bremangerlandet. Magne Kjerpeseth stod støtt i den striden. At det har vore krevjande viser interjuet han hadde i Firdaposten. Stor takk til Magne Kjerpeseth.

*Politikarane i Bremanger *har verkeleg fått «passet sitt påskrive» av Motvind sine deltakarar. Ein skal vere sterk, skal ein klare å stå i slik strid over tid. Eg vart difor så imponert over varaordførar Svein Olav Senneset som på vindkraftmøte i Svelgen, der NVE var arrangør, tok ordet på ein roleg og sakleg måte og imøtegjekk nokre av innlegga frå talarstolen. Han påpeika og oppførsel til nokre av deltakarane, som prøvde å latterleggjere vindkraftutbyggar, grunneigarane og politikarane. Tusen takk, Svein Olav Senneset, for at du hadde mot og kraft til å ta «den ballen».

Eg har og undra meg over kva det gjer med eit menneske, som gong på gong snakkar ned personar ein er ueinig med. Eg tenkjer at det må gå an å få fram kva ein sjølv meiner og står for, utan å vere nedlatande overfor politikarar og andre ein ikkje er einig med.

No er igjen Motvind på barrikadane, når det gjeld eventuell vindkraftutbygging på Myklebustfjellet og Ramskredfjellet. Dette er urørt landskap, vert det hevda. Ramskredfjellet og området rundt vart utbygt for vasskraftproduksjon for meir enn 60 år sidan. No heiter det seg at området er sårbart, med sine tunnelar, tunellrøyser, nedtappa vatn, demningar m.m. Dette er ikkje vesentleg, virkar det som. Samstundes med denne utbygginga vart og to vatn i Flora kommune utbygd og overført til Indrehus-vassdraget. Straumen gjekk til Svelgen og Bremanger Smelteverk, der det vart skapt arbeidsplassar.

I dei dagar var det korkje eigedomskatt eller produksjonsavgift. Det er noko som har kome til i seinare år, men arbeidsplassar var vesentleg og viktig. Ein kan så spørje kor det hadde vore for svelgensamfunnet og Bremanger Smelteverk, om denne utbygginga ikkje hadde blitt noko av. Dette vart arbeidsplassar som folk frå Ytre Bremanger og Norddalsfjord nytta seg av, men og heile kommunen. Det er såleis ikkje grunn for å vere nedlatande mot dei som ser at ny vindkraftutbygging er viktig for Bremanger kommune. Då må kommunen no ha fokus på å skaffe dei framtidige inntekter som trengst, til bygging av skule, basseng, og behalde gode kommunale tenester.

Det har og blitt vist til at det er uheldig av omsyn til Ålfotbreen landskapsvernområde, om Ramskredfjellet bli utbygd med vindmøller. Ein kan så spørje kor mange fjell, dalar og vatn bør det vere mellom eit landskapsvern – og eit vindkraftområde? I luftlinje er det 4,4 kilometer på det knappaste.

I dette fjellområdet går det mest ikkje folk. Difor er det ingen merka stiar mot landskapsvernområdet. Eg har aldri treft på eit menneske i dei åra eg har gått i desse fjella, også på overnattingsturar, men som ein person litt ironisk uttrykte det: «men det kjem det til å gjere no……» Det er langt å gå frå Indrehus til Ramskredfjellet, og frå Kinn-sida er det krevjande.

*Det er å håpe *at vi kan ha ein litt meir respektfull tone overfor kvarandre. Det er ikkje respektfullt av Sveinulf Vågene på Motvind sitt møte i Svelgen tidlegare i år, der han viste til at om ikkje kommunedirektøren kunne få eit budsjett i balanse på ein berekraftig måte, så fekk han finne seg noko anna å gjere. Tom Joensen er ein dyktig fagperson som har hjelpt Bremanger gjennom krevjande år etter Terra.