Herold

Det vart eit mykje spesielt folkemøte om den store utbygginga i Vik, 3. desember. Møtet vart sett til to timar, der utbyggjarar Statnett, Sygnir, Statkraft, og dessutan NVE skulle ha ein time på å leggja fram deira tankar og løysningar for prosjektet. Så skulle vikjafolket få ein time til å komma med spørsmål.

Det enda med at Tor Carlsen i NVE hadde ordet i 40 av dei 60 minuttane som vikjene skulde bruka til å leggja fram sin frustrasjon over Sygnir sin vanvitige plan. Som prøver med triks og lureri, og få NVE til å gå for at dei får ta over og drifta den gamle 300 kV-linja. Men når det er sagt, fekk karen frå NVE sagt opp til fleire gonger, at skal vikjene vera med på å påverka kva alternativ som vert valt, må dei senda inn ein skriftleg uttale på kva dei meiner.

Eg reknar med att alle dei som var på folkemøtet og fekk sjå bileta, vart skremde over alternativ 1, som er å behalde den gamle 300 kV monsterlinja i stål pluss ei ny 420 kV som ruvar endå meir. Steimslia blir eit kaos av linjer. To store monsterlinjer med krysningar frå Steimslia og over til Klyv/Ovri. Ut Ovrisdalen med monstermaster fordi gardane Ovri, Halrynjo og Stedje på begge sider av busetnaden. Ja, det såg skremmande gale ut.

Må seia, det er litt av eit paradoks. Her har Statkraft og Statnett dei siste 20 åra, rydda opp i gamle miljøsynder etter kraftutbygginga på 60- og 70-talet. Fjerna gamle linjer og jamna ut gamle steintippar, rydda vekk skrot og skrammel som låg att etter utbyggingane. Slik at fjellheimen vår skal syna seg fint fram att, men kva prøver Sygnir no i 2025. Jau, lura seg vekk frå alternativ 2, der vikjene får tilbake akseptabel fin natur frå Steimslia, ned til Hove og ut Ovrisdalen.

Berre det at Sygnir vågar å komma med dette absurde forslaget, syner at dei har null respekt for Vikjabygdi, spesielt for grendene Steim, Fosse, Ovri, Halrynjo, Stedje og Refsdal. Det er no veldig rart om vikjer tilsette i Sygnir og Sognekraft står bak dette. Steimslia.

Steimslia er eit mykje nytta frilufts område for vikjene. Her ligg trimløypene tett i tett: Tambsvegen til Varpet, opp frå Fossvingen- , Mula-, Krikaveg- og Abnastølløypa frå Tenold med fleire. Sygnir prøver no å øydeleggja dette området med alternativ 1.

Alternativ 1 øydelegg alt dette. Alternativ 2 gjer dette turområdet for vikjene mykje betre, for linjene er vekke. Vikjabygdi vert faktisk finare. 300 kV er sanert og den store linja ned til Hove er faktisk vekke. I staden vert det lagt ein 132 kV jordkabel frå Seim til Hove. Med den løysninga er det ryddig og greitt. blir ei kryssing frå Steimslia til Klyv. Linja vil koma høgare oppe i lia, både over Steim og Ovrid, med bygging av den nye 420 kV-traseen mellom Steimslia og Klyv.

Og dette er viktig å hugsa på, at det er dette alternativet Vik kommune i 2016** **sette som krav, dersom det vart bygging av Feios kraftverk. Det er no kampen står vikjer, det er no de må mobilisera. Korleis vil me at bygda vår skal sjå ut? Etter 7. januar 2026 er det for seint å koma med innspel. Vinn Sygnir fram med å behalda den gamle 300 kV-linja? Ja, då har vikjene tapt endå meir av den fineVikjabygdi som frå før har gitt frå seg mykje til storsamfunnet.

Alle elvane våre er turrlagde, no er dei berre nokre attgrodde groafar, berre Vikja som renn frå Hove og ned til fjorden, og om sommaren køyrer Statkraft vasstanden opp og ned alt etter kor gode kraftprisane er på kraftbørsen. Dei få laksane som er att, veit verken opp elde ned, om dei skal gå på elva, eller gje faen og sym til Balestrand.

Alle fjellvatna våre er regulerte, og det gode gamle fisket er borte, stort sett berre att småfisk. Og vil du no opp til fjells og prøva fiskelukka ein skinande sommardag, er det sannsynleg at Statkraft har tappa vatnet heilt ned til minstevasstand, og ein går og vabbar i 50–60 meter gjørme, før ein kjem seg ned til vatnet.

Det er det me vikjer sit att med etter kraftutbygginga. Me har ofra mykje til storsamfunnet, og no driv me på og slit ut ein ordførar føre og hin etter, for å få storsamfunnet med på å gje oss ein trygg veg over Vikafjellet. Hjelper dei oss, nei, og ikkje kjem dei til å gjera det heller. Men dei er flinke til å lova å lyga om Vikafjellstunellen framfor kvart einaste val, og så er det gløymt att.

Vikjer, no må me samla me oss, å gjera alt som står i vår makt på å stoppa Sygnir sine galskapsfakte.

Eitt lite sidesprang. Når ein no ser at verda vår ikkje er so fredeleg meir, me som trudde det skulle vara inn i eva. Putin bombarderer straumnettet og trafostasjonane borti i Ukraina natt og dag. Då tek me, så dumsnille som me er, å byggja Vestlandets største stikkontakt ute i det fri, midt på dan einaste flate dyrka marka som er i Refsdal. Trafoane skulle sjølvsagt vore sprengt inn i ein fjellhall, der verken rakettar eller bomber når dei. Og fjell er det nok av ut i Refsdal. Blir så dyrt seier dei som styrer verdas rikaste land. Ja, det er lettare å spara seg til fant, eller gje bistand til land ute i verda som ikkje treng det.

Meld deg inn på Facebook-sida Hjarta for Vik. Der finn du ei lenkje til eit opprop. Her kan alle vikjer setja namnet sitt, slik at NVE og Sygnir ser at heila bygda står samla mot å behalda dei gamle monstermastene.

Så vikjer, no er det opp til dykk, om korleis de vil bygda vår skal sjå ut, etter at Vestlandets største stikkontakt er ferdig utbygd.