Herold

Knoltatunnelen på E16 har no fått auka køyrehøgd. Det til stor glede for høge køyretøy, som tidlegare har teke borti tunelltak og høgdeavgrensingar.

Senka vegen

– Det har blitt veldig bra med fri køyrehøgd i E16 Knoltatunnelen. Me er begeistra for jobben som er gjort, seier regionsjef Jan-Ove Halsøy i Norges Lastebileier-Forbund.

Det er Statens vegvesen og entreprenør Mesta som står bak arbeidet i den 356 meter lange tunellen mellom Evanger og Bulken.

– Mange av våre sjåførar har opplevd at bilane tek oppi taket i denne tunellen. E16 er blodåra mellom Vestlandet og Austlandet, så me er veldig nøgde med alle tunellar der ein får auka køyrehøgd som her. Det er gjort ein flott jobb som me er veldig takksame for, seier Halsøy.

Gjennomsnittleg vert tunellen trafikkert av 5190 køyretøy dagleg, der 18 prosent er tungtrafikk.

Kart: Her ligg Knoltatunnelen:

Køyrehøgda i tunellen er no auka frå 4,3 til 4,5 meter.

– Me har senka vegen for å auka køyrehøgda. Med dette grepet unngår me problemet med at høge køyretøy tek borti tunelltak eller høgdeavgrensingar, seier Per Arne Blindheim, teknisk byggjeleiar tunell i Statens vegvesen.

Arbeidet vart gjort tidlegare i år, og tok ein månad.

– Mesta har utført jobben på ein veldig tilfredsstillande måte i godt samarbeid med dyktige lokale underentreprenørar, legg han til.

Det vart i denne perioden jobba døgnkontinuerleg for å gjera arbeidsperioden så kort som mogleg.

– Me takkar trafikantane for godt samarbeid og stor tolmod i anleggsperioden, seier Blindheim.

Politiet med åtvaring: – Ser ut til det vert ein ny runde med dette

Håpar på tunnelgodkjenning i 2026