Herold

Viktigast å spare pengar

Raudt finn saksutgreiinga så langt mangelfull

Med omsyn på løysing for ny fotballbane på Dale, føreslo Raudt Vaksdal i sist kommunestyremøte å følgje kommunen sin opphavlege plan. Me sa det slik: «Få opp ein rasvoll snarast og bygg ny fotballbane på grasbana på Geitabakken.» Me hevda at dette ville vere den desidert raskaste vegen til mål. Tidsaspektet var hovudårsaka til vårt forslag.

Avstemming i saka var slik at alle parti kunne stemme på alle 3 forslaga til løysingar som låg føre. Forslaget frå Raudt fekk kun Raudt si eiga stemme.

Eit hovudargument for å gå bort frå kommunen sin opphavlege plan, var at Eviny, dersom dei får konsesjon for Dale III, vil påta seg kostnadane med å byggje den påkravde rasvollen, stipulert til 11 millionar kroner. Slik kunne kommunen spare pengar.

Uvisse omkring konsesjonssvar og tidsaspektet i saka om konsesjon blir innvilga, blei sekundære i val av løysing.

Når «Evinyforslaget» blei vedteke, var alle samde om at ei midlertidig løysing på Sandliane var påkravd.

Raudt vil krevja ei utgreiing og ein kalkyle av totalkostnadane for «Evinyforslaget». Dvs kostnadene for midlertidig ballbane på Sandliane + kostnadar for nyetablering av fotballbane på steinfyllinga i området Geitabakken. Det siste må taka omsyn til m.a. tilkomst, parkering, flytting av klubbhus, lys, tilrettelegging av straum/vatn/kloakk og ventetid med den prisauken det medfører.

Same slags utgreiing og kalkyle over totalkostnad for kommunens opphavlege plan, må også føreliggje. Berre slik vil ein kunne vurdere desse alternativa opp mot kvarandre med tanke på økonomi.

Når det gjeld tidsaspektet med tanke på ferdigstilt bane, skil alternativa seg klårt frå kvarandre.

For Raudt Vaksdal, Leif Inge Eide, kommunestyrerepresentant.