Herold

Ervin Beheim, fødd 28. februar 1959, døydde 21. november 2025.

Ervin starta i Helse Førde i oktober 2019, og var prosjektleiar for utbyggingane Liva og Svana 1 ved Førde sentralsjukehus.

Som leiar var Ervin opptatt av at dei som jobba i prosjekta skulle ta eigarskap til arbeidet og målet. Han gjekk sjølv inn med full innsats, og vel så det, og sette høge krav til prosjektet og å få eit godt sluttresultat.

Dei åra han jobba i Helse Førde vekependla han frå Hafslo og budde på hybel i Førde. Han var på jobb lange dagar, og stillte opp langt utover det ein arbeidsgjevar kunne forvente.

Han fekk såleis eit nært forhold til mange kollegar i Førde, jobba mykje og engasjerte seg breitt. Han delte gjerne av si breie erfaring med dei som var interessert, men aldri på ein påtrengande eller skrytete måte.

Fagleg ville Ervin aldri kompromisse med det han meinte måtte til for å oppnå eit godt resultat. Han kunne vere ein bestemt forhandlar, men var også oppteken av at ting skulle gå skikkeleg føre seg, av folkeskikk og at det skulle vere rettferdig.

Ervin var ein lun og humørfylt person - smilande, handlekraftig og dedikert. Likte å prate med folk, diskutere, allsidig, open og alltid interessert i nye løysingar og læring.

Ervin var aldri brautande, men bidrog til å skape godt miljø og god stemning rundt seg.

Tankane våre går til Ervin sine næraste, og vi lyser fred over Ervin Beheim sitt minne.

Lustringen Ervin lagar det største bygget i Sogn og Fjordane