Herold

Streiken på Riksavtalen er i si sjette veke. Dersom konflikten ikkje er løyst innan 2. juni, vil Fellesforbundet setja i verk boikott av streikeramma bedrifter.

Riksavtalen organiserer tilsette i hotell, restaurant, kantine, reise- og uteliv.

Fellesforbundet har reist krav om auka kjøpekraft og forskotering av sjukepengar, foreldrepengar og pleiepengar.

Tysdag varslar dei boikott til alle bedrifter som er omfatta av streiken.

– Oppmodinga til boikott vil bli retta mot allmenta, andre bedrifter og organisasjonar, skriv dei i ei pressemelding.

Boikotten vil bli sett i verk frå 2. juni dersom NHO Reiseliv ikkje bidreg til å løysa streiken innan den tid.

– Det er sterkt beklageleg at Fellesforbundet no vel å eskalere konflikten på denne måten i staden for å lytte til dei små og mellomstore bedriftene, seier Magne Kristensen, forhandlingsleiar og direktør for arbeidslivspolitikk i NHO Reiseliv, til NTB.

– Dette stadfestar inntrykket av at dei ikkje ønskjer reelle forhandlingar, men heller vil presse fram ei løysing som mange små og mellomstore bedrifter har sagt klart frå om at dei ikkje kan bere.

Riksavtalen er eit av dei største låglønnsområda i norsk arbeidsliv, og organiserer tilsette i hotell, restaurant, kantine, reise- og uteliv. Bedriftene i streik er mellom anna Hotel Bristol i Oslo, Britannia i Trondheim, og dessutan fleire Scandic-hotell i heile landet.