Herold

Sogndal kommunestyre vedtok nyleg å sjå på moglegheitene for alternativ organisering av vass- og avløpssektoren. Det blei i vedtaket vist til kommunane Bømlo, Stord og Øygarden i Vestland fylke.

Vass- og avløpssektoren er kritisk infrastruktur og avgjerande for at eit samfunn skal fungere. Det kjem fullt til syne i Ukraina-krigen der slike anlegg er regelmessige mål for russiske rakettar og dronar. Oppgåvene i åra framover innan vatn og avløp er mange:

• Reduksjon av lekkasjar på vassleidningsnettet
• Sikring og trygge vassforsyninga slik at ho i større grad er i stand til å motstå sabotasje/uønskte hendingar
• Auka reinsing av avløpsvatnet, allereie vedteke av EU og truleg del av norsk lovverk i nær framtid
• Reduksjon av overvatn (regnvatn og grunnvatn) inn på avløpsnettet, avgjerande for å kunne nå framtidige reinsekrav.

Investeringane som skal gjerast er store, og mange kommunar slit med å rekruttere nok tilsette. Dette gjeld og mellomstore kommunar som Sogndal.

Bømlo Vatn og Avløp (heretter BVA) og ØyVAR (tidlegare FjellVar) blei begge oppretta for meir enn 20 år sidan. Begge selskapa, BVA og ØyVAR, driv svært godt med stor gjennomføringsevne og fagleg dyktigheit. Felles for desse 2 verksemdene er at dei er aksjeselskap med eige styre, 100 % eigd av kommunen og har ansvaret for vass og avløpssektoren. Bestillinga på kva som skal gjerast kjem frå kommunestyret via Hovudplan for Vatn og Avløp. Politikarane har såleis full kontroll med aktiviteten til selskapa og storleiken på kommunale gebyr. Begge selskapa har liten/ingen problem med å rekruttere nye medarbeidarar, i motsetnad til mange kommunar.

Stord VA blei etablert 1. mai 2025 etter modell frå Bømlo og Øygarden er såleis eit nystarta selskap. Auka gjennomføringsevne var eit viktig moment i samband med etablering av selskapet. Det var og stor politisk semje om at dette var rette vegen å gå.

Arbeidarpartiet ved Henny-Kristin Asperanden Navarsete kritiserer SV i avisinnlegg 19. mai i Sogn Avis for å støtte fleirtalsvedtaket i kommunestyret om å innhente erfaringar om alternative organisasjonsformer for vass- og avløpssektoren. Omgrep som privatisering, dårlegare arbeidsvilkår og pensjonsrettar, mindre demokratisk kontroll av fellesskapets ressursar er brukte for å syne kor feil dette vedtaket er. Eg vil derimot gje SV honnør for å tenkje nytt; korleis skal samfunnet klare å løyse dei store oppgåvene som ligg og ventar dei neste åra innan vass- og avløpssektoren på beste måte. Dette må vurderast på fritt grunnlag!

Til Arbeidarpartiet vil eg gje følgjande melding, begge selskapa BVA og Øyvar som altså har vore i drift i over 20 år, rekrutterer betre enn dei fleste kommunane. Arbeidsvilkår og pensjonsrettar kan vel dermed ikkje vere så veldig dårlege! Den demokratiske kontrollen er ivareteke gjennom bestillinga i kommunestyret. Så er det sjølvsagt viktig å ha eit oppegåande styre som sett krav og fører kontroll med administrasjonen.

Eg synes vedtaket Sogndal kommunestyre har gjort er bra. Det blir spennande å sjå den vidare utviklinga.

Til slutt må eg innrømme at eg synes det er litt morosamt å lese om New Public Management og kritikken av SV i innlegget til Henny-Kristin Asperanden Navarsete; «Eg har nok vore naiv som trudde at Sosialistisk Venstreparti (SV) var mot New Public Management og utskiljing av kommunal tenester». Er ho ikkje klar over at det nettopp var Arbeidarpartiet (Stoltenberg-regjeringa 2000- 2001 og 2005 – 2013) som i si tid innførte dette styringsprinsippet i offentleg sektor?

Oppgradering av vatn og avløp er også miljø, ikkje berre økonomi

Sogndal vatn og avføring AS?