Herold

55.000 pass og ID-kort i Vestland må fornyast i år. Gjeld det deg og dine kan det vera lurt å vera ute i god tid.

Arne Voll, kommunikasjonssjef i Gjensidige, fryktar at mange planlegg sommarferien utan å vera klare over at passet snart går ut.

– Mange trur passet varer «lenge nok», og det gjer det ofte for vaksne. Men for barn er gyldighetstida langt kortare, seier Voll i ei pressemelding.

For barn under 10 år er passet kun gyldig i to til tre år, noko mange foreldre ikkje er klare over.

Viktig beskjed til alle i Vestland

Heilt nye tal frå Politidirektoratet og berekningar frå Gjensidige viser at nærmare 55.000 pass og ID-kort i Vestland må fornyast i løpet av året. Ei ny undersøking gjennomført av Ipsos for Gjensidige viser at 1 av 4 nordmenn ikkje har sjekka passet sitt det siste året.

– Det er bekymringsfullt, særleg no som mange er i full gang med å planlegga sommarferien, seier Voll.

Kan bli dårleg tid

Dersom passet må fornyast før sommarferien, kan det vera dårleg tid. Fleire passkontor melder om lange ventetider – enkelte stadar på over éin månad.

– Viss eitt familiemedlem har utløpt pass, kan heile ferien ryka, seier Voll.

Viss reisa må avlysast fordi pass eller andre reisedokument ikkje er i orden, blir ikkje det dekka av reiseforsikringa. Dette er den reisande sitt ansvar, avsluttar Voll.

Vanlege feil som stoppar reisa:

Feil pass blir med til flyplassen

Passet er utløpt

Passet er skadd

Manglande visumkrav eller innreisetillating

Namn stemmer ikkje med billetten

Barnet/barna sin dokumentasjon er ikkje i orden

Mange land krev at passet er gyldig i fleire månadar etter innreise

Gyldighet på pass: *

0–5 år: 2 år

5–10 år: 3 år

10–16 år: 5 år

Over 16 år: 10 år

*Kjelde: Politiet