Herold

To tungbilsjåførar blir melde for grove brot på reglane om køyre- og kviletid.

Under kontrollen på Krossmoen kontrollstasjon fredag blei 110 tunge køyretøy kontrollerte. Av desse vart 17 tatt til sides for ein utvida kontroll. Kontrollen resulterte i:

• Ei åtvaring for brot på reglane om køyre- og kviletid
• To bruksforbod for sikthindrande gjenstandar i frontruta, som måtte fjernast før vidare køyring
• Mangellapp knytt til bremser, lys, bilbelte, skade på støtfangar, sprekk i frontrute, laus skjerm og luftlekkasje

Den automatiske skiltgjenkjenninga reagerte på to lette køyretøy. Det eine blei avskilta for manglande EU-kontroll, mens på det andre køyretøyet var det ei registrering som ikkje var fullført.

Alvorlege brot

Litt færre tunge køyretøy blei kontrollerte på laurdagen. Men i tillegg blei òg nokon lette køyretøy kontrollerte. Ti køyretøy blei tatt til sides for ein utvida kontroll.

To tilfelle av alvorlege brot på reglane om køyre- og kviletid blei melde til politiet. I tillegg blei det gitt to åtvaringar og skrive ut to gebyr.

Tre køyretøy – to semitilhengarar og éi trekkvogn – blei tatt inn for utvida bremsetest. Eitt av køyretøya hadde tekniske manglar i bremsesystemet.

Brei last var dårleg sikra

Eitt vogntog frakta brei last og blei definert som «spesialtransport». Vogntoget var ikkje merkt som spesialtransport, og det var forbode å køyra slike transportar på kontrolltidspunktet.

Resultatet blei bruksforbod. Sjåføren fekk valet mellom å merka vogntoget med gult blinkande lys og køyra i tidsrommet då det var lov å køyra – eller lasta om.

Det blei òg registrert dårleg lastsikring på dette vogntoget, og lasta måtte sikrast betre.