Herold

Kvinner i Eigersund og Bjerkreim gjorde sitt til å oppretthalda folketalet, men antalet dalbuar gjekk likevel ned i første kvartal. 1. april var det 25.023 innbyggarar i Dalane, to færre enn ved årsskiftet.

Statistisk sentralbyrå offentleggjorde denne veka befolkningsstatistikken for første kvartal. Den viser at det bare var éin av Dalane-kommunane som per 1. april hadde fleire innbyggarar enn ved årsskiftet, nemleg den største.

Folketalet i Eigersund auka med 15 i løpet av årets tre første månader, frå 15.546 til 15.561. Veksten skuldast ein kombinasjon av fødselsoverskot og tilflytting frå andre kommunar. Det blei født 40 nye eigersundarar i januar, februar og mars. I same perioden døydde 33 personar i kommunen. Mens fleire flytte frå Eigersund til utlandet enn antalet innvandrarar som busette seg i kommunen, var det ei netto tilflytting frå norske kommunar på 17 personar. Samla nettoinnflytting, inkludert inn- og utvandring, var på åtte personar.

Den andre kommunen med betydeleg fødselsoverskot første kvartal, er Bjerkreim. Ti nye bjerkreimbuar såg dagens lys mens bare to døydde.

I Sokndal blei det født seks og i Lund bare fire ungar i løpet av første kvartal. Dette gav eit fødselsoverskot på minus 1 i Sokdal og minus 4 i Lund.

Men det gledelege fødselsoverskotet i Bjerkreim var ikkje nok til å gi folkevekst i kommunen. På grunn av større utflytting til andre norske kommunar enn tilflytting gjekk innbyggartalet ned med tre og er nå på 2.891.

Også Sokndal «mista» fire innbyggarar og hadde per 1. april 3.352 innbyggarar. Her gjekk innanlands inn- og utflytting opp i opp mens det var tre fleire som flytte frå Sokndal til utlandet enn motsett veg.

Av Dalane-kommunane var det Lund som fekk størst nedgang i folketalet i første kvartal. Antalet lunddølar per 1. april var 3.219, ti færre enn ved inngangen til 2026. Størst utslag gjorde utvandringa til utlandet. Åtte personar flytte frå Lund og ut av landet mens ingen kom flyttande til kommunen frå utlandet i løpet av årets tre første månader.

Totalt sett blei det to færre dalbuar i første kvartal.

Befolkningsutviklinga i Dalane første kvartal 2026:

Befolkninga i Dalane har passert 25.000: Men bare éin kommune vaks i fjor