Filmregissør Anja Breien vert bisett
Fleire prominente gjestar kom for å ta farvel med den norske filmpioneren. Blant dei var Jens Stoltenberg, som stod henne svært nær.
Fredag vart Anja Breien bisett frå Akershus festning i Oslo.
Filmregissøren døydde 10. mai, 85 år gamal.
– Eg saknar Anja. Det er trist at ho er borte. Samstundes veit eg at ho levde eit fullt og heilt liv, sa ein tydeleg prega finansminister Jens Stoltenberg (Ap) til NRK på veg inn.
Spillefilmer av Anja Breien
- Voldtekt, 1971
- Hustruer, 1975
- Den alvarsamme leken, 1977
- Arven, 1979
- Forfølgelsen, 1981
- Papirfuglen, 1984
- Hustruer – 10 år etter, 1985
- Smykketyven, 1990
- Hustruer III, 1996
Kilde: Store norske leksikon
Filmregissøren døydde 10. mai, 85 år gamal.
Skodespelar Lise Fjeldstad vart godt kjend med Breien allereie på 60-talet.
– Det er utruleg kor mykje ho har betydd for norsk film og for kvinnesaka. Å setta bein under seg som kvinne og filmregissør på den tida, det var tøft. Då skulle du vera sterk, seier Fjeldstad, og held fram:
– Anja var sterk og samstundes sjarmerande.
Skodespelar Lise Fjeldstad etter bisettinga.
Heldt kontakten
Finansministeren hadde eit tett forhold til Breien, som var kjærast med faren (og tidlegare utanriksminister) Thorvald Stoltenberg frå 2014 til han døydde i 2018.
Jens Stoltenberg deltok i seremonien.
Stoltenberg seier Breien betydde mykje for han, både som filmskapar og som del av familien.
– Ho var ein stor og imponerande filmskapar, men ho var òg kjærasten til faren min. Etter at han gjekk bort, heldt me fram med å vera nære. Eg er heldig som fekk verta så godt kjent med henne. Ho var viktig for meg, for Camilla (Stoltenberg, journ.anm.) og for våre familiar, seier han.
Siterte Breiens mest kjende film
Tidlegare kulturminister Ellen Horn (Ap) var seremonileiar i bisettinga, medan noverande kulturminister Lubna Jaffery (Ap) var ei av dei som talte.
Tidlegare kulturminister Ellen Horn var seremonileiar.
Ho starta med å sitera «Hustruer», ein av dei mest kjende filmane til Breien.
– Det er så mange replikkar frå «Hustruer» som har gått inn i norsk filmhistorie. Så mange scener. Den frigjerande og ærlege dialogen, den lausslepte, men kontroversielle ranglinga. Kvinner som snakkar som kvinner. Som ikkje vert sett gjennom blikket til ein mann, innleia Jaffery.
Kulturminister Lubna Jaffery (Ap) var ein av talarane i bisettinga.
Kulturministeren gjekk vidare til å kalla Breien ein pioner og ei føregangskvinne.
– Ho har bana veg. Det har kome mange kvinner etter henne, men me ser at det framleis er ein diskusjon i filmbransjen om det er nok mangfald, seier Jaffery til NRK etter bisettinga.